Кичә мәктәпләрдә дулкынланып көтеп алган бәйрәм тантанасы – Соңгы кыңгырау чыңлады. Унбер ел элек беренче тапкыр мәктәп бусагасын атлап кергән кызлар һәм малайлар өчен шатлыклы да, бераз гына моңсу да көн булды ул. Бу еллар эчендә күп нәрсәгә өйрәнелгән, белем тупланган, якын дуслар табылган. Алда – озын юл... Тагын да катлаулырак белем үрләрен яулыйсы, хезмәттә чыныгасы, матур тормыш төзисе бар. Ә әлегә чыгарылыш сыйныф укучыларына үтә дә җаваплы сынауны үтәргә – Бердәм дәүләт имтиханнарын уңышлы тапшырырга кирәк.Агымдагы елда республикада Бердәм дәүләт имтиханын 16183 кеше тапшырачак. Шулардан быелгы чыгарылыш сыйныф укучылары – 15020, узган елгы чыгарылыш сыйныф укучылары – 1017, колледж студентлары – 132 һәм 10 унынчы сыйныф укучысы, 20се – үткән елларда дәүләт йомгаклау аттестациясен тәмамламаган, 1се – чит ил гражданы.Узган елдагы кебек үк, унберенче сыйныф укучыларына аттестат алу өчен ике мәҗбүри фәннән – урыс теленнән һәм математикадан имтихан тапшырырга кирәк.Алда торган имтихан кампаниясенең яңалыгы – контроль-үлчәү материалларын дискларда имтиханнар үткәрү пунктларына тапшыру бетерелде. Быелдан барлык имтихан материаллары Федераль тест үзәгеннән имтихан көнендә якланган элемтә каналлары аша пунктларга тапшырылачак.Быел Бердәм дәүләт имтиханының төп чоры 26 майда башлана. Ул көнне чыгарылыш сыйныф укучылары география, әдәбият һәм химия буенча сынау тотачак. Беренче мәҗбүри фәннән — урыс теленнән имтиханны, мәктәпне тәмамлаучылар 29 майда тапшырачак. Икенче мәҗбүри имтихан, база һәм профильле дәрәҗәдәге математика буенча, бер көндә — 1 июньдә узачак.Быел республика мәктәпләрен 15 меңгә якын — унберенче, 48 меңнән артык — тугызынчы сыйныфлар укучысы тәмамлый. Бүген аларның һәркайсының күңелен киләчәккә ышанычлы омтылыш, якты теләкләр чорнап алган. Күпләре үзе сайлаячак һөнәрне, юнәлешне дә билгеләп куйган. Алда торган имтиханнарны уңышлы тапшырып, шул уйларны тормышка ашырасы гына бар.Тәҗрибәле директор Азамат Мәгъзүмов җитәкләгән Иске Балтач 2нче мәктәбендә 11нче сыйныфны быел 19 укучы тәмамлый. Болар — иң-иңнәр, Бердәм дәүләт имтиханыннан курыкмаган кыю ун кыз һәм тугыз егет. Мәктәп елларын бергә дус, тату булып, кулга-кул тотынышып атлаган сыйныфташлар. Алар төрле, һәркайсының үз фикере, тормышка карашы бар. Араларында бүгенге заман үрләрен кыю яуларлык үткерләре дә, авыл балаларына гына хас оялчанлыкны саклап калучы сабырлары да күренә...— Быел мәктәпне бик көчле сыйныф тәмамлый, сигез укучыбыз медальгә бара. Укучыларымның барысы да тырыш, сәләтле һәм максатчан. Төрле бәйгеләрдә, олимпиадаларда уңышларыбыз байтак. Киләчәктә дә бездә белем алган кызлар һәм егетләр сынатмас, республикага, илгә лаеклы шәхесләр булырлар, дип ышанам. Мин аларның кешелекле, изге күңелле булып калуын телим, — ди унберенчеләрнең сыйныф җитәкчесе Нурия Сабирова.Нурия Ташбулат кызы мәктәптә 34 ел математика укыта. Мөгаллимә 5нчедән алып җитәкләгән сыйныфтагы укучылары турында яратып та, горурланып та сөйли. Ул һәрберсенең уңышлары белән безне дә таныштырып өлгерергә тырышты. Әнә уку алдынгысы Алия Әхкәмова берничә ел рәттән “Зур тәнәфес” Бөтенрусия конкурсында катнашкан. Башкортстан командасы составында Казан, Саранск шәһәрләрендә булып кайткан. Диләрә Хисмәтова, тырышып укудан тыш, волонтерлык эшен дә уңышлы башкара. “Сәләт” төбәкара форумында волонтер булу онытылмаслык тәэссоратлар калдырган. Сәләтле кыз быел V Халыкара иншалар конкурсы призеры да булган.Шунысы мөһим, Иске Балтач 2нче мәктәбе унберенчеләре алда торган сынауга бик җитди әзерләнә. Кызлар һәм егетләр әйтүенчә, көненә 7-8 сәгать вакытын алар нәкъ имтиханнарга әзерлек өчен бүлә. Укучыларның күпчелеге БДИга әзерләнү өчен онлайн курслар сайлаган. Аларның күпчелеге, төп фәннәрдән тыш, җәмгыять белемен, тарих, информатика, биология, химия, профильле математика, инглиз телен тапшырачак. Чыгарылыш сыйныфы укучылары арасында юрист, программист, педагог, медицина белгече булырга теләүчеләр дә бар. Алар арасында, әлбәттә, районга, туган мәктәбенә эшкә кайтучылар да булыр әле. Әлеге белем учагында һөнәр сайлау алдында торган кызлар һәм егетләр өчен матур үрнәк бар: бүген биредә белем бирүче дистәләгән яшь укытучы нәкъ шушы мәктәпне тәмамлаган.Алда — зур тормыш юлының башы. Унбер ел буена белем һәм тәрбия биргән укытучылар — укучылары, ә әти-әниләр уллары һәм кызлары белән горурланырлык тормыш юлы булсын иде ул!