ՀՀ ՊԵԿ-ը տարածաշրջանում աննախադեպ քանակի «ֆենտանիլ» տեսակի թմրամիջոցի մաքսանենգության դեպք է կանխել, դեպքերով կան ձերբակալվածներ, հայտնում են ՊԵԿ լրատվական ծառայությունից։
Մաքսանենգության դեմ պայքարի վարչության օպերատիվ հետախուզության և Զվարթնոց բաժնի աշխատակիցներն ԱՄՆ քաղաքացի Ա.Ք-ի անվամբ ՀՀ ներմուծված առաքանու մաքսային զննման արդյունքում հայտնաբերել են 10,8 գրամ ընդհանուր քաշով «հերոին» տեսակի թմրամիջոց, որը թաքցված է եղել առաքանու իրերի մեջ: Հիշյալ առաքանին ստանալիս ԱՄՆ քաղաքացին ձերբակալվել է:
ԱՄՆ քաղաքացու հետ փոխկապակցված անձանց պարզելու և բացահայտելու նպատակով ձեռնարկված գործողությունների արդյունքում ՊԵԿ մաքսանենգության դեմ պայքարի վարչության և ԱԱԾ աշխատակիցների տեսադաշտում է հայտնվել մի նոր քաղաքացի` Է.Մ-ն:
«Տեղեկություններ են ձեռք բերվել առ այն, որ տվյալ քաղաքացու անվամբ Հայաստան է ներմուծվելու առաքանի, որը, հնարավոր է, պարունակի թմրամիջոցներ: ՊԵԿ մաքսանենգության դեմ պայքարի վարչության և ԱԱԾ աշխատակիցների կողմից մաքսային զննման է ենթարկվել ՀՀ քաղաքացու անվամբ ներմուծված առաքանին, որում առկա քաղցրավենիքի փաթեթի միջից հայտնաբերվել Է «ֆենտանիլ» տեսակի թմրամիջոցի 80 հաբ: Դրանք միախառնված և թաքցված են եղել նույն ապրանքանիշի քաղցրավենիքի հետ»,-հայտնում են ՊԵԿ-ից՝ տեղեկացնելով, որ նշված քաղաքացու բնակության վայրից հայտնաբերվել է նաև 2 հատ «Մակարով» տեսակի հրազեն, բազմաթիվ օգտագործված ներարկիչներ` թմրամիջոցների հետքերով:
ՊԵԿ-ից հայտնում են, որ, համաձայն ԱՄՆ արդարադատության թմրամիջոցների դեմ պայքարի գործակալության (DEA) պաշտոնական հրապարակումների, «ֆենտանիլ» տեսակի թմրամիջոցի 10 հաբից 6-ը պարունակում է մահացու չափաբաժին, իսկ համաձայն վիճակագրական տվյալների` ԱՄՆ-ում 2022 թվականի ընթացքում «ֆենտանիլ» տեսակի թմրամիջոցից մահացել է շուրջ 72 հազար քաղաքացի և այս ցուցանիշը տարեցտարի ավելանում է:
Մայիսի 17-ին հայտնել էինք, որ Հայաստանի ԱԱԾ-ն Էկվադորից թմրանյութերի մաքսանենգության սխեմա է բացահայտել։ Մայիսի 16-ին Իտալացի մաքսավորները առգրավել էին Էկվադորից Հայաստան ուղեւորվող ռեկորդային 2734 կգ կոկաինը։
Մայիսի 13-ին ԱԱԾ-ն պարզել է, որ ՀՀ-ում գործող և մրգերի ներմուծմամբ զբաղվող ընկերության կողմից Էկվադորում գտնվող ընկերությունից պատվիրված ապրանքատեսակի հետ ներմուծվել է «Կոկաին» տեսակի շուրջ մեկ տոննա քաշով թմրամիջոց (շուրջ 250 միլիոն Եվրո արժողության), որը հայտնաբերվել և գտնվում է ՀՀ ազգային անվտանգության ծառայությունում: