Башҡортостанда дәүләт иҫәбенә 504 аттракцион, шул иҫәптән 109 ҡышҡы тау ҡуйылған. Был республикала булған ошондай ҡоролмалар паркы. Был хаҡта бөгөнгө аҙналыҡ оператив кәңәшмәлә Үҙйөрөшлө машиналарҙың һәм башҡа төр техниканың техник торошон күҙәтеү буйынса төбәк дәүләт инспекцияһы етәксеһе Урал Искәндәров белдерҙе. 2023 йылдың иртә яҙы мәҙәниәт һәм ял парктарында миҙгел асыуҙы тиҙләтте. Күңел асыу техникаһы хужалары 395 аттракцион әҙерләгән, шуларҙың 384-е эшкә ҡушылған. Һынау лабораториялары эксперттары 11 аттракционда идара итеү системаларының, механизацияланған узелдарҙың төҙөк булмауын, миҙгел-ара һаҡлау шарттарын боҙоуҙарҙы асыҡлаған. – Был бик мөһим мәсьәлә, – тине Радий Хәбиров. – Балаларыбыҙ ял итә алһын өсөн техниканы контролдә тотоу мөһим. Республика халҡының, айырыуса балаларҙың хәүефһеҙлеге өсөн Радий Хәбиров Дәүләт техник күҙәтеү тәҡдиме буйынса муниципалитет башлыҡтарына ҡорамалды мотлаҡ тикшергәндән һәм ваҡытлыса теркәгәндән һуң ғына ҡуйыуҙы килешергә ҡушты. Тағы бер тема – мәҙәниәт тармағына ҡағылды. 2024 йылда республиканың барлыҡ театр-концерт ойошмалары яңы автотранспорт саралары менән тәьмин ителә. 500 миллион һумдан ашыуға 94 берәмек техника һатып алынған да инде, машиналар менән тәьмин итеү бара. Ошондай мәғлүмәттәрҙе үҙенең докладында төбәктең мәҙәниәт министры Әминә Шафиҡова килтерҙе. Дәүләт мәҙәниәт учреждениеларына ете “НЕФАЗ” ҡала-ара автобусы тапшырылды ла инде. 26 майҙа 26 берәмек автотранспорт – 12 “Газель” микроавтобусы һәм 14 еңел автомобиль асҡыстарын тапшырыу тантанаһы үтә. Автоклубтар республика мәҙәни тормошоноң мөһим өлөшөнә әйләнде. 2020-2021 йылдарҙа “Мәҙәниәт” милли проекты сиктәрендә 10 күсмә күп функциялы мәҙәни үҙәк һатып алынған. Автоклубтарҙың бурысы – стационар учреждениелар булмаған алыҫтағы тораҡ пункттарҙа йәшәгән халыҡтың мәҙәни ихтыяждарҙы ҡәнәғәтләндереү. – Автоклубтың фургоны сәхнәгә, кинотеатрға, китапханаға әүерелә – бының өсөн уларҙа бөтә кәрәкле ҡорамалдар бар, – тине Әминә Шафиҡова. – Улар нигеҙендә төрлө мәҙәни һәм байрам сараларын уҙғарырға мөмкин. Автоклубтар белем биреү һәм аң-белем таратыу маҡсатында, мәҫәлән, лекциялар үткәреү, музей һәм китапхана күргәҙмәләре ойоштороу, кинофильмдар һәм спектаклдәр күрһәтеү өсөн файҙаланыла. Ошо ваҡыт эсендә автоклубтар 2,5 мең тапҡыр юлға сыҡҡан һәм 460 мең кешене төрлө саралар менән солғап алған. Шулай уҡ махсус хәрби операцияла ҡатнашыусылар яйға һалынған урындарҙа концерт программалары менән гастролдәр ойошторҙолар. Радий Хәбиров ижади коллективтарға әүҙем эштәре өсөн рәхмәт белдерҙе һәм республика мәҙәниәт учреждениеларының мобиллеген планға ярашлы арттырырға ҡушты. Фото: Башҡортостан Башлығы сайты.