Сәсеүлектәр зыян күрҙе

Хөкүмәттең Республикаға идара итеү үҙәгендә ойошторолған аҙналыҡ кәңәшмәһен һәр саҡтағыса Башҡортостан Башлығы Радий Хәбиров алып барҙы. Унда үткән аҙнаға йомғаҡ яһалды һәм киләһенә бурыстар билдәләнде. Илдар Заһиҙуллин Башҡортостанстат етәксеһе вазифаһын ваҡытлыса башҡарыусы итеп тәғәйенләнде. Быға тиклем ул етәксе урынбаҫары булып эшләгән. Радий Хәбиров уға яңы вазифаһында уңыштар теләне һәм Илдар Заһиҙуллиндың бөтә кәрәкле компетенцияларға эйә булыуын билдәләне. Башҡортостанда уҙған тәүлектә коронавирус инфекцияһын йоҡтороуҙың 92 осрағы асыҡланған. 123 пациент стационарҙа һаулығын нығыта, 1278 кеше өйҙә дауалана. Был хаҡта республиканың һаулыҡ һаҡлау министры Айрат Рәхмәтуллин хәбәр итте. Сирҙе дауалау өсөн дауаханаларҙа 235 урын әҙерләнгән, урындарҙың 17 проценты буш. Башҡортостан Башлығы республиканың Транспорт министрлығына һәм Өфө хакимиәтенә, кешеләр маршруттарын нисек үҙгәртергә кәрәклеген аңлаһын өсөн, Шаҡша күперен ябыу датаһын алдан хәбәр итергә ҡушты. – Мөмкин булғанса, күперҙең үткәреү һәләтен һаҡларға кәрәк. Зәки Вәлиди урамында ремонт барғанда барыһын да бик яҡшы эшләнек, кешеләргә лә уңайлы булды. Әле байтаҡ ҡалаларҙа һәм райондарҙа юлдарҙы ремонтлана һәм төҙөлә. Кешеләр бының кәрәклеген аңлай. Ләкин улар эштәрҙең ҡасан тамамланыуын белмәүгә зарлана. Алдан халыҡты иҫкәртергә кәрәк, – тине Радий Хәбиров. Башҡортостан Хөкүмәте вице-премьеры – сәнәғәт, энергетика һәм инновациялар министры Александр Шельдяев Башҡортостан рәсми делегацияһының 16-21 майҙа Иранға сәфәре йомғаҡтары тураһында һөйләне. Иран Башҡортостан өсөн өҫтөнлөклө тышҡы иҡтисади йүнәлештәрҙең береһе булып тора. Башҡортостан-Иран мөнәсәбәттәренең ыңғай динамикаһы 2023 йылдың беренсе кварталында былтырғы ошо уҡ осор менән сағыштырғанда тышҡы сауҙа әйләнешенең 14 тапҡырға (17,2 миллион доллар, 2022 йыл йомғаҡтары буйынса - 93,2 миллион доллар) үҫеше менән раҫлана. Башҡортостан Республикаһының коллектив стендында туғыҙ компания, шул иҫәптән бәләкәй һәм урта эшҡыуарлыҡ субъекттарына ҡараған һигеҙ предприятие ҡатнашты. Иранда булған осорҙа Башҡортостан вәкилдәре бер меңгә яҡын һөйләшеү үткәргән, уның буйынса килешеүҙәргә ҡул ҡуйылған. Атап әйткәндә, Башҡортостан биләмәһендә уйынсыҡтар етештереүҙе локалләштереү мәсьәләһе тикшерелде. Проект буйынса инвестицияларҙың яҡынса күләме 1,5 миллиард һум самаһы тәшкил итеүе ихтимал. Бындай производствоны “Алға” махсус иҡтисади зонаһында урынлаштырыу планлаштырыла. Башҡортостанда был аҙнала тағы бер нисә ирекле подразделениены хәрби күнекмәгә оҙатыу сараһы уҙасаҡ. “Был юлы оҙатыу "Патриот" хәрби-тарихи паркында уҙа, сөнки Совет майҙанында "Китап-байрам" китап йәрминкәһе үтәсәк”, – тине Радий Хәбиров. Башҡортостанда яҙғы сәсеү тамамлана. Сәсеүҙе тулыһынса һигеҙ район тамамлаған, алдағы көндәрҙә 23 район тамамлай. Башҡа райондарҙа һуң өлгөрә торған культураларҙы сәсеү эштәре бара. Республика буйынса 22 майға план майҙандарының 90 процентына яҙғы культуралар сәселгән, йәғни 1 миллион 841 мең гектар. Был хаҡта Башҡортостан Хөкүмәте вице-премьеры - ауыл хужалығы министры Илшат Фәзрахманов хәбәр итте. Майҙың тәүге ун көнөндә республиканың күп кенә райондарында -5, -9 градусҡаса һалҡынайтып, ҡырау төшөүе күҙәтелде. Улар сәсеүлектәргә зыян килтергән. Шәкәр сөгөлдөрө, арпа, рапс һәм башҡа культуралар республиканың 31 районында яҡынса 120 мең гектарҙа зыян күргән. Шуларҙың 91,5 мең гектарында культураларҙың һәләк булыуы теркәлгән, был майҙандарҙы ҡайтанан сәсергә кәрәк. Яҡынса зыян 590 миллион һумдан ашыу тип баһалана. Баҡалы, Илеш, Шаран һәм Саҡмағош райондары сәсеүлектәре айырыуса ныҡ зыян күргән. Был хәл буйынса ошо көндәрҙә ҡарар ҡабул ителәсәк. Фото: "Башинформ".