Найти тему
Кызыл таң (СМИ)

Шигъри сүзе сихри көчкә ия

Күпкырлы талант иясеРаушан Фәйзрахман улын районда белмәгән кеше юктыр. Туган төбәгендә узган бихисап чараларда катнашучы гына түгел, аларны оештыручы да ул. Менә инде өч дистә ел мәдәният өлкәсендә көч сала – Кысынды авылы мәдәният йортына җитәкчелек итә. Үзе җырлый, үзе бии, режиссер буларак та осталыгына хәйран калырлык – сәхнәгә чыгарылган спектальләр, скетчлар, хәзер инде Интернет челтә­рендә популярлык яулаган видеолар шул хакта сөйли. Чараларның сценарийларын да ул үзе яза. Ә шигырь­ләре район һәм республика басмаларында даими басылып тора, Интернет челтәрендә дә кайнар табадан төшкән иҗат җимеш­ләре белән ихлас уртаклашып бара.Район гәзитенең дүрт тапкыр лауреаты булуы, район һәм республика күләмендә оештырылган иҗади бәй­геләрдә җиңү яулавы да — аның күп­кырлы шәхес булуына тагын бер дә­лил. Әйе, автор тормышыбызны, бү­генге көнкүрешебезне укучыларына искиткеч дөрес һәм матур шигъри юл­ларга төреп җиткерә. Шул ук вакытта аларның күбесе җыр буларак таныш – аларны Башкорт­станның һәм Татар­станның танылган эстрада йолдызлары башкара. Наил Ганиев, Нурия Абдуллина, Флера Шәри­пова, Раил Өметбаев, Риф Бикбаев һәм башка композиторлар аның әсәрләре белән ихлас эш итә.Күпкырлы талант иясе булуга һәм даны тирә-якка таралуга карамастан, Раушан Фәйзрахман улы үтә дә гади, киң күңелле, ихлас һәм ярдәмчел. Әйт­кәндәй, “Кызыл таң”ның үз хәбәр­че­се булып эшли башлагач, үзем дә аның ярдә­мен тойдым һәм Архангель райо­ныннан тәүге мәкалә­лә­рем нәкъ Кысынды авылыннан булды.Кайда туган – шунда кирәк булган“Кайда туган – шунда кирәк булган” дип әйтәләр гомер буе туган җиренә берегеп, шунда халык мәнфәгать­лә­рен кайгыртып, кече Ватанына кирәк бу­лып тормыш итүчеләр турында. Раушан Фәйзрахман улы да – шундыйларның берсе. Урындагы мәк­тәпнең 8нче сыйныфын тәмам­лагач, Уфа шәһәренә укырга юллана. Ләкин бер айдан сагынып кире кайта һәм район үзәгендәге һөнәр­челек училищесында сатучы һөнәрен үзләштерә. Ләкин алган белгечлеге буенча бер ел гына эшләргә туры килә, сәнгатькә булган сөюе бик көчле булып чыга. Авыл мәдәният йортына эшкә чакыргач, һич икеләнмичә ризалаша һәм урыны шунда булуын үзе дә аңлый. Читтән торып Стәрле­тамак мәдәният техникумын тәмамлый.Утыз ел дәвамында ул үзен чын профессионал итеп күрсәтә. Моны авыл­дашларының мактау сүзләре, төрле бәйгеләрдә җиңеп, яуланган бихисап Дипломнар, Рәхмәт хатлары, Мактау грамоталары да дәлилли. Җитәкче башлангычы белән авылда нинди генә бәйрәмнәр оештырылмый: “Сылукай”, “Уйна, гармун!”, “Дуслык биюе”, “Бавырсак бәйрәме”, “Яшьләр җыены”, “Иге­зәкләр” кебек конкурслар һәм чаралар аның башлангычы белән үткәрелеп, бу елларда йолага әверел­де. Шунысын да аерым билгеләп үтәсем килә: 2014 елда Раушан Фәйзрахман улы җитәкче­лек иткән мәдәният йорты Русия Мәдә­ният министрлыгының 100 мең сумлык грантын алуга иреште. 2015 елда кысындылылар янә республика грантына лаек булды.Авыл, район тормышында да актив катнашып яши Раушан Хаҗиәхмәтов, шуңа аның шатлыгын уртаклашу өчен әллә күпме халык җыелды. Яңа китап­ның исем туе уңаеннан тантана сәбәп­чесен район хакимияте башлы­гының социаль мәсьәләләр бунча урынбасары Гөлчәчәк Сәгыйтова, район Советы секретаре Фәез Йортымбаев, энциклопедист, журналист Клара Әһлиул­лина, районның Ветераннар советы рәисе Мөнирә Локманова, “Ак инәйләр” коры җитәкчесе Зилә Фәйзул­лина, район һәм республика бас­малары хезмәт­кәрләре, хезмәт­тәшләре, каләмдәш дуслары, аның шигырьләренә язылган җырларны башкаручылар иң изге теләкләрен җит­керде.Изге теләкләр, бай хатирәләр...Авторны тормышындагы күркәм һәм шатлыклы вакыйга белән котларга килүчеләр сәхнә түрендә бер-берсен алыштырып торды. Районның бер төр­кем мәдәният хезмәткәрләре шундый шә­­хес белән кулга-кул тотынып эшләүл­әренә сөенеп бетә алмый. Район гәзи­тенең баш мөхәррире Гөлшат Закирова да аңа чиксез рәхмәтләрен җиткерде.— “Инҗәр” гәзите дисәң — Раушан Хаҗиәхмәтов күз алдына килеп баса, Раушан дигәндә – район басмасы. Моңа гаҗәпләнәсе дә юк. Гәзит дөнья күрә башлагач та безнең арада тыгыз хезмәт­тәшлек күпере урнашты. Гәзит битлә­рендә аның иҗат җимешләре генә басылмый, ул үзенең уй-фикер­ләре белән дә уртаклаша һәм без аларны бергәләп тормышка ашырып киләбез. Күпме әдәби кичәләрне, күләм­ле чараларны бергәләп үткәрдек. Хәтта район басмасы каршында “Дулкын” иҗади берләшмәсен дә бергә ачып, уңышлы алып барабыз, — диде Гөлшат Зөфәр кызы, тантана сәбәп­че­сенә иҗади уңышлар теләп.Районның “Ак инәйләр” клубы җи­тәкчесе Зилә Фәйзуллина билге­ләвенчә, башкорт хатын-кызларын беләштерүче оешманы да Раушан Хаҗиәхмәтовтан башка күз алдына китереп булмый. Чараларга сценарийлар язудан тыш, үзе дә анда актив катнаша.“Дулкын” иҗади берләшмәсе әгъ­засы – Кырмыскалы районының Сахай авылыннан Таһир Вилданов та иҗатташ дустының шатлыклы вакыйгасын уртаклашырга ашкынып килгән. Аларның икесен дә район басмасы таныштырган, бер елда алар икесе дә лауреат булып таныла һәм шуннан бирле дуслык җепләре бәйләнеп китә. Әйткәндәй, бу ике шәхес күрше районнар һәм тугандаш милләтләр арасындагы дуслыкны ныгытуга да зур өлеш кертә.Гомумән, чыгыш ясаучыларның һәммәсе — Раушан Хаҗиәхмәтовның үзе, иҗаты һәм эшчәнлеге белән якыннан таныш кешеләр. Шуңа аның күптән “Башкортстанның атказанган мәдәният хезмәткәре” исеменә лаек булуын бил­геләп үттеләр. Район хакимияте вәкил­ләре дә, әлеге тәкъ­дим­не хуплап, бу юнә­лештә үз ярдәм­нәрен күрсәтергә вәгъдә бирде.Зифа һәм Гөлдәр Абдуллиналар алып барган бу чара кунакларның чыгышлары, тәбрикләү сүзләре җыр-моң белән үрелеп барды. Кысынды авылы “Ак инәйләр”е һәм Салават филармониясе артисты Зөлфия Бирдегулова Раушан Хаҗиәхмәтов сүзлә­ренә языл­ган җыр­лар­ны башкардылар, туганна­ры шигырь­ләрен сөйләп, хатирәләре белән уртаклашты, дуслары һәм хезмә­тәш­ләре изге теләклә­рен җиткерде һәм ихлас соклануларын, горурлануларын белдерде. Гомумән, бу чара хозур табигатьле Кысынды авылында ачык йөз­ле, киң кү­ңелле, кунакчыл, берсенең шатлыгы өчен икенчесе сөенә белүче бердәм, әдәбиятка һәм сәнгатькә гашыйк кешеләр яшәвен дә күрсәтте.Эльвира ЯМАЛЕТДИНОВА,“Кызыл таң”ның үз хәбәрчесе.