Тәү ҡарамаҡҡа башҡа тиңдәштәренән һис тә айырылмай Реана: шулай уҡ көләкәс, ихлас, алсаҡ һәм аралашыусан, һорауҙарға ла бик ихлас яуап бирә, бер аҙ ғына тулҡынланыуы һиҙелә. Ә бына эш шахмат таҡтаһына барып етһә, унан да етдиерәк, тынысыраҡ һәм уйсаныраҡ баланы тапмаҫһың! Грециялағы уңыш Тап бына ошо холоҡ һыҙаттары Реанаға Грецияның Родос утрауында үткән уҡыусылар араһындағы шахмат буйынса донъя чемпионатында, туғыҙ партияла 7,5 мәрәй туплап, көмөш миҙал яуларға булышлыҡ итте лә. Сарала 53 илдән 530 йәш шахматсы үҙ көсөн һынап ҡараны. Унда Башҡортостан әләме төшөрөлгән футболка кейгән ҡыҙ икенсе урынға лайыҡ булды. Быға тиклем Башҡортостан шахматсылары йәштәр араһында классик шахмат буйынса үткәрелгән донъя чемпионаттарында ошондай юғары наградаға лайыҡ булғаны юҡ ине. Реана Кинйәбулатова тренеры Семен Григорьев менән был ҡаҙанышҡа үҙенә күрә бер “баҫҡыс” буйлап “үрмәләп барҙы”: башта – Башҡортостан, артабан – Волга буйы федераль округы, аҙаҡ Рәсәй турнирында миҙал яуланылар. Грецияла үткәрелгән донъя чемпионатында еңеү Реанаға еңел бирелмәне. Беренсе турҙа ул судьяларҙың яңылышлығы һөҙөмтәһендә йыйылған мәрәйҙәренән “ҡолаҡ ҡаҡты”, әммә бәләкәй ҡыҙ үҙен тиҙ генә ҡулға алды һәм биш тапҡыр рәттән еңеү яуланы! Ә быға уның ныҡышмал, сәмсел холҡо булышлыҡ итте. Тик бына донъя чемпионы булыу өсөн ярты балл ғына етмәне. Беренсе урынды – Монголиянан Цогтгерель Герелт-ойю, өсөнсөнө Һиндостандан Аджай Петель Рейна яуланы. Ваҡыт үтер, был үрҙе лә яулар, моғайын, Реана. Йәш шахматсының серҙәре Былтыр Реана Кинйәбулатова шахмат буйынса Анатолий Карпов кубогына алтын һәм көмөш миҙал яулағайны. Был сарала ул үҙенең тиңдәштәре генә түгел, үҙенән өлкәнерәк, туғыҙ йәшлек спортсылар араһында ла отҡорлоғо, зирәклеге, аҡылы менән айырылып торҙо. Был спорт төрөн ҡыҙ ағаһы Романға эйәреп үҙ иткән. Ул да баш ҡалала һәм республикала үткәрелгән шахмат турнирҙарында төрлө миҙалдар яулаған. Тағы егет музыкаль мәктәптә лә шөғөлләнергә ваҡыт таба. Роман да, хәҙер уның һеңлеһе Реана ла скрипка серҙәренә өйрәнә. Ҡыҙҙың тәүге тренеры – атаһы Ренат Кинйәбулатов. Ул – химия фәндәре кандидаты, шахмат буйынса спорт мастерлығына кандидат, Рәсәй Фәндәр академияһы Өфө федераь-тикшеренеү үҙәге Молекулалар һәм кристалдар институтының өлкән ғилми хеҙмәткәре. Ҡыҙҙың шахматта еңеү серҙәре – тыумыштан килгән шәп хәтер һәм ныҡлы ихтыяр көсө. Тап ошо һыҙаттары, бынан тыш, гимнастика, хореография менән дә шөғөлләнергә булышлыҡ итә. Реана баш ҡалала 2015 йылғы ҡыҙҙар араһында үткәрелгән йөҙөү буйынса ярыштарҙа ла бер нисә тапҡыр тәүге урынды яулаған. Ағаһы Роман менән тағы бер яратҡан шөғөлдәр бар: икеһе лә роллер спортын үҙ итә. Ә уларҙың һеңлеләре Рәминәгә әле өс кенә йәш. Бәлки, ул да киләсәктә апаһы һәм ағаһы кеүек спортты үҙ итер, ул да еңеүҙәр яулар?! Быны, әлбиттә, ваҡыт күрһәтер. Реана – Өфөләге Әғзәм Фәйзуллин исемендәге 39-сы гимназияның I класс уҡыусыһы. Уҡыуҙа ла алдынғы ул, спортта ла һынатмай. Бына шундай ғәжәйеп бала менән танышырға тура килде. Өфөлә ошолай һәләтле, тырыш балалар үҫкән Роза менән Ренат Кинйәбулатовтарҙың ғаиләһе йәшәй. ...Ә Реананың һәм башҡа йәш шахматсыларыбыҙҙың уңыштарында Башҡортостан Шахмат федерацияһының һәм уның президенты – оҙаҡ йылдар республикала ошо спорт төрөн үҫтерергә хеҙмәт иткән Әмир Дауҡаевтың тырышлығын баһалап бөткөһөҙ. Тап улар, тренерҙар, Башҡортостан исемен тотош донъя ҡитғаларына яңғыратыр спортсылар тәрбиәләй. Автор фотоһы.