Алты көнлөк бәпес... күл төбөндә

Ошо көндәрҙә Өфө ҡалаһының Нижегородка биҫтәһендә булған хәлде ысын мөғжизәгә тиңләргә була. Өләсәй кеше алты көнлөк сабый менән Долгое күле тирәләй йөрөргә тип сыға. Бер мәлдә, ҡатындың йәш ярымлыҡ ейәне ситкә йүгереп китә, уны тотам тип артынан киткәс, бәпес ятҡан коляска тәгәрәп күлгә төшөп китә. Өләсәй коляска артынан ташлана, әммә шок хәлендә булып бәпесте таба алмай. Ул ярҙам һорап ҡысҡыра башлай. Һәм шул мәлдә, бәпестең бәхетенә, күл янынан велосипедта бер ир китеп барған була. Ул тиҙ арала эштең айышына төшөнә һәм күлгә һикерә. Ул – Өфө кешеһе Наил Яҡупов булып сыға. Уның ҡатыны Людмила Яҡупова был хәл тураһында “Башинформ” агентлығына һөйләгән. Баҡһаң, ул да бәпесте тиҙ генә таба алмай. Күлгә бер нисә тапҡыр сумғандан һуң ғына түңкәрелгән колясканы күреп ҡала, уның аҫтында бәпес ятҡан була. Наил Ғүмәр улы тиҙ генә уны сығара һала. Сабыйҙы ҡотҡарған герой ир ғаиләһенә был хәл тураһында тәүҙә бик һөйләмәй. “Күлдә баланы ҡотҡарҙым” тип кенә әйтә лә, мунсаға йылынырға китә. Тик иртәгәһенә генә хәлде һөйләп бирә. “Мин уға һорауҙар бирәм, ә ул бер нимә лә һөйләмәй, шок хәлендә ине. Тик иртән генә төнө буйы йоҡламауы, баланың яҙмышы өсөн борсолоуы тураһында әйтте. Ул колясканы тиҙ генә күрмәгән икән, тапҡас, күлдең төбөн һәрмәп, бәпесте лә тапҡан”, – тип һөйләгән уның ҡатыны. Һуңғараҡ асыҡланыуынса, был ғаилә имен булып сыҡҡан, иҫәптә тормаған. Ғаиләлә яңы тыуған сабыйҙан тыш йәш ярымлыҡ ҙур малай ҙа тәрбиәләнә. “Сабый иҫән булһын тип ныҡ борсолдоҡ, доғалар уҡыныҡ. Наилдан “бәпес шунда уҡ ҡысҡырҙымы” тип һорап ҡарайым да, ул бик иҫләмәй ине, сөнки шок хәлендә булған. Мин ирем менән ғорурланам”, – тигән Людмила Яҡупова. Наил Ғүмәр улы пенсияға тиклем полицияла эшләгән, Чечняла булған. Әле хаҡлы ялда булһа ла, сауҙа үҙәгендә һаҡсы булып эшләүен дауам итә. Бәпескә килгәндә, әле ул 17-се ҡала дауаханаһында, табиптарҙың күҙәтеүе аҫтында. Фото: "Башинформ".