Республиканың бер нисә үҙәк район дауаханаһына яңы электрохирургия аппараттары килтерелде. Улар – барлығы 31 берәмек техника – “Һаулыҡ һаҡлау” милли проектына (национальный проект “Здравоохранение”) ярашлы, һатып алынды. Был маҡсатҡа федераль бюджеттан 15,5 миллион, республика ҡаҙнаһынан 2,9 миллион һум аҡса бүленде. Электрохирургия аппараттары – бик тәьҫирле һәм аныҡ техника, уны ҡан ағыуын туҡтатыу, туҡымаларҙы киҫеп алыу һәм шештәрҙе асыҡлау өсөн ҡулланалар. Төп үҙенсәлеге – юғары йышлыҡтағы ток менән эшләүе. Радиотулҡындарҙың антисептик үҙенсәлеге һәм туҡымаларға аҙ тәьҫир итеүе һөҙөмтәһендә пациенттар операциянан һуң тиҙ төҙәлә. Яңы ҡорамалдар алыусы дауаханалар араһында Ҡырмыҫҡалы һәм Саҡмағош үҙәк район дауаханалары бар. Рәсәй Президенты Владимир Путиндың “май” указдарына ярашлы, һаулыҡ һаҡлау тармағы алдында торған ошо бурыстарҙы тормошҡа ашырырға кәрәк: хеҙмәткә һәләтле йәштәге халыҡтың үлем күрһәткестәрен кәметеү, шулай уҡ яман шештәрҙән үлем күрһәткестәрен ( 100 мең кешегә 185 сир осрағына тиклем) аҙайтыу, сабыйҙар үлемен ҡыҫҡартыу (бер мең яңы тыуған сабыйға 4,5 промиллегә тиклем) һәм һәр кемдең тәүге медицина ярҙамынан файҙаланыу мөмкинлектәрен арттырыу. “Һаулыҡ һаҡлау” милли проектына (национальный проект “Здравоохранение”) ярашлы, инновациялы медицина технологияларын, шул иҫәптән, пациенттың сәләмәтлегенә иртә диагностика һәм дистанцион мониторинг системаһын индереү, тармаҡта берҙәм дәүләт мәғлүмәт системаһы нигеҙендә медицина ойошмаларының үҙ-ара берҙәм эшмәкәрлеге механизмдарын булдырыу – көн ҡаҙағындағы бурыстарҙың береһе. Фото: Һаулыҡ һаҡлау министрлығы.