Һәр кешенең күңеленә ятҡан шөғөлө була. Был бигерәк тә хаҡлы ялға сыҡҡас нығыраҡ тойола. Кемдер - бәйләм, икенселәр милли биҙәүестәр эшләү, өсөнсөләр сәскә үҫтереү менән мауығып китә. Ишембай районының Алаҡай ауылынан Гөлсинә Ильясова баҡса үҫтереүҙе үҙ иткән. Был йәһәттән уға тормош иптәше Раһип Тимербай улы ла ныҡлы ярҙам итә. Әйткәндәй, былтыр район кимәлендә баҡсасылар араһында уҙғарылған конкурста ла уңған ғаилә 1-се урын алыуға өлгәшкән. Ильясовтарҙың теплицаларында май уртаһы булыуға ҡарамаҫтан боростары, помидорҙары емешләнеп ултыра ине. Эште хужабикә февраль айынан уҡ башлаған. Тәүҙә өйҙә орлоҡ сәсеп үҫентеләрен үҫтергән. Көн йылытыу менән, апрель аҙаҡтарында, теплицаға сығарған. Помидорҙарын июнь аҙаҡтарында ашай ҙа башлайҙар икән. Уңған хужабикәнән баҡса үҫтереүҙең серҙәре менән дә ҡыҙыҡһындыҡ. –Ашлама өсөн һыйыр тиҙәген әсетеп ҡулланабыҙ. Мәҫәлән, ҡаҙанға бер биҙрә һыйыр тиҙәге һалам да тулғансы һыу өҫтәйем, бер стакан көл ҡушып бутайым. Шул ҡатнашма әсегәнсе ултыра. Бызырҙай башлағас, бер литр әсетмәне 10 литрлы бер биҙрә һыуҙа бутайым да һибәм. Үҫентеләр үҫкән ваҡытында был ашламаны ҡулланам, емешләнә башлағас, туҡтатам. Бөтә йәшелсәләргә, сәскәләргә лә килешә. Ә помидор, кәбеҫтә, һарымһаҡты көл һибеп тә ашлайым. Көл артынан һыу һипһәң, тупраҡҡа һеңә. Бәрәңге ултыртҡанда ла ашлама ҡулланабыҙ. Уны сәскәндә ояһына янған тиреҫ менән бергә бер аҙ көл һалабыҙ. Бәрәңгебеҙ йыл һайын уңа, - ти баҡсасы. Быйыл яҙғы ҡырау үҫентеләрҙе бер аҙ зарарлаһа ла, Ильсовтарҙың баҡсаһы матур ғына үҫеп килә. Еләктәре лә шау сәскәгә күмелеп ултыра. “Баҡса уңһын өсөн, әле йылы менән ямғыр кәрәк. Һәм, әлбиттә, ваҡытында утау”, –ти Гөлсинә апай. Баҡса хужабикәнең күңеленә көс бирә, унда эшләп ҡәнәғәтлек ала. Йыш ҡына иртәнсәк 7-8-ҙәрҙә үк ул баҡсаһына сыға. Автор фотоһы.