Հայաստանն ամեն ինչ անում է, որպեսզի թե՛ երկրի, թե՛ երկրում աշխատող ընկերությունները չընկնեն երկրորդային սանկցիաների տակ, Հանրային հեռուստաընկերությանը տված հարցազրույցում ասաց ՀՀ էկոնոմիկայի նախարար Վահան Քերոբյանը՝ անդրառնալով Արևմուտքի կողմից սանցիայի տակ ընկնելու ռիսի վերաբերյալ հարցին։
Նա ավելացրեց, որ Հայաստանը, որպես տրանզիտ դեպի Ռուսաստանի Դաշնություն արտահանման համար օգտագործելու վտանգի մասին է։
«Մենք մեր ունեցած գործիքակազմով փորձում ենք մեր ընկերություններին զերծ պահել երկրորդային սանկցիաների տակ ընկնելու ռիսկից: ԵԱՏՄ միջավայրում ապրանքների տեղաշարժն ազատ է։ Բնականաբար այդ տեղաշարժի մեջ մենք չենք կարող ԵԱՏՄ պայմանագրերը խախտելով որոշակի արգելքներ դնել»,- ասաց նա։ Խոսելով «Չոր նավահանգիստ» նախագծի մասին՝ Քերոբյանն ասաց, որ գործընթացները գնում են առաջ, և որ տնտեսական խորը վերլուծության փուլն է արդեն։
«Մենք ունենք արդեն այդ փուլը հաղթողին։ Հոլանդական շատ խորը մասնագիտացում ունեցող ընկերություն է, որն առաջիկա 3 ամիսներին մեզ կհիմնավորի և նաև ցույց կտա՝ ինչպես է պետք ճիշտ աշխատեցնել Չոր նավահանգիստը Գյումրիում»,- ասաց նա։
Հայաստանի էկոնոմիկայի նախարարության ղեկավար Վահան Քերոբյանը խոսել է նաև երկրում ագրարային բարեփոխումների ծրագրերի մասին։ Մեկնաբանելով գյուղատնտեսության ցածր ցուցանիշները, նա նշեց, որ 1990-ականներին հողային բարեփոխումները շատ սխալ են իրականացվել, յուրաքանչյուր գյուղացի ստացել է 4 հողատարածք՝ 1,5 հա ընդհանուր մակերեսով։
Նախարարի խոսքով՝ նման կոնֆիգուրացիայով հնարավոր չէ արդյունավետ գյուղատնտեսությամբ զբաղվել։ «Հիմա մենք հողային բարեփոխումների գործընթացում ենք։ Պիլոտային ծրագիրը բավականին լավ է ընթանում, որից հետո պետք է քննարկենք դրա ընդլայնումը։ Խոսքը պետության կողմից հողերի համախմբման միջոցով ավելի մեծ հողատարածքներ ստեղծելու և ներդրողներին տրամադրելու մասին է։ Բացի այդ, կա մասնավոր համախմբման ծրագիր, որը, կարծում եմ, նույնպես շուտով կսկսի ավելի լավ աշխատել»,- ասաց նախարարը։