Тикшеренеүҙәрҙән күренеүенсә, һөт өлкәндәр өсөн әллә ни файҙалы аҙыҡ түгел, тип табылған, “сөнки уны самаһыҙ күпләп эсеүҙең онкология сирҙәрен һәм һаулыҡҡа ҡағылған башҡа проблемаларҙы ҡуҙғытып ебәреүе мөмкин”, тип иҫәпләй терапевт, эндокринолог Елена Киселева. Уның әйтеүенсә, һөттәге эстроген ҡандағы пролактин гормонын арттыра, ә уныһы тестостерон барлыҡҡа килеүен кәметә, шулай уҡ ҡатын-ҡыҙҙарҙа күкрәк шеше хәүефенә килтереүе ихтимал. Һөттәге лейцин кислотаһы күҙәнәктәрҙең бүленеүенә һәм үҫеүенә булышлыҡ итә, тимәк, шештәр, лайлалы тиресә һәм простата (ирҙәрҙең енес биҙе шешеүе) яман шеше хәүефе бермә-бер арта. Һөттә шулай уҡ ҡанда зарарлы липидтар кимәлен арттырыусы майҙар бар, улары атеросклероз һәм йөрәк-ҡан тамырҙары сирҙәренә юлыҡтырыуы мөмкин. Лактоза организмды инсулин етештерергә мәжбүр итә, ә был процесс кәүҙә ауырлығы артыуына булыша. Тарҡалмаған лактозаның күплеге эсәклек эшмәкәрлеген боҙа, йыш ҡына метеоризм, ауыртыу, уҡшыу тыуҙыра. Һөттәге глобулиндар һәм казеин ахырынаса эшкәртелеп бөтмәгәс, эсәклек эпителийын (йоҡа күҙәнәк япма) зарарлай һәм хроник сирҙәргә, аллергия һәм онкологияға килтерә, тип аңлата табип. Һөт аҙыҡтары кальцийҙың төп сығанағы булып тора, көнөнә бер-ике стакан һөт эсеү йәки 100 грамм сыр ашау файҙалы. Шуға күрә һөттө самалап эсеү организмға күберәк файҙа килтерәсәк, тигән һығымта яһаған белгес. Фото: Дзен.ру