"Төбәк-ара хеҙмәттәшлек өсөн ишектәрҙе тағы ла киңерәк асырға кәрәк", - тине Башҡортостан Башлығы Радий Хәбиров “Рәсәй - Ислам донъяһы” халыҡ-ара форумында. "Беҙ төбәк-ара хеҙмәттәшлекте үҫтерәбеҙ. Тышҡы сәйәси, сауҙа бәйләнештәре өсөн байтаҡ ишектәр ябылһа ла, яңыларын асабыҙ. Бөгөн Ислам форумында 80-дән ашыу Ислам дәүләтенең Рәсәйҙе хуплауын күрҙек. Улар беҙҙең менән хеҙмәттәшлек итергә әҙер. Әле Иран вәкилдәре менән осраштыҡ. Был - тәүге аҙымдарыбыҙ: Ирандың да, беҙҙең дә тейешле тәжрибәбеҙ юҡ, финанс йәһәттән иҫәп-хисаптарҙың асыҡ һәм аңлайышлы системаһы әлегә булдырылмаған, уның өҫтөндә ике яҡтың дәүләт-ара комиссияһы эшләй. Беҙҙең арала тауар әйләнеше бер аҙ "ҡуҙғала" башланы. Мәҫәлән, беҙҙән үҫемлек майы, ә уларҙан, әйтәйек, киптерелгән емеш-еләк һатып алабыҙ. Беларусь Республикаһындағы кеүек тәрәнерәк интеграциялауҙы теләйбеҙ. Һис шикһеҙ, ҙур өлөштө туризм биләй, сөнки халыҡ ҡыҙыҡһына, йөрөргә теләй. Ирандың тарихи, иҫтәлекле урындары күп, шуға күрә был йәһәттән хеҙмәттәшлек мөмкинлектәрен дә файҙаланабыҙ. Алда төрлө яҡлы эш көтә", - тине Радий Хәбиров. Фото: "Башинформ".