Өфөлә компьютер спорты буйынса Рәсәй беренселеге ойошторола. Бәйге баш ҡалабыҙҙың "Өфө-арена" спорт һарайында 20-21 май көндәре үткәрелә. Башҡортостандың спорт министры Руслан Хәбибовтың һүҙҙәренә ҡарағанда, компьютер спорты беренселеген уҙғарыу идеяһын Башҡортостан Башлығы Радий Хәбиров тәҡдим иткән. – Башҡортостан – спорт яратыусы төбәк, – тине Руслан Таһир улы. – Беҙҙә 120-нән ашыу спорт төрө үҫешә, улар буйынса ярыштар даими үтеп тора. Компьютер спорты беренселеге Рәсәй Спорт министрлығының 100 йыллығы сиктәрендә уҙа. Компьютер спорты беренселеге уңайынан үткәрелгән матбуғат конференцияһында Рәсәй Компьютер спорты федерацияһы президенты Дмитрий Смит, Рәсәй Компьютер спорты федерацияһының Башҡортостан төбәк бүлексәһе рәйесе Азамат Моратов ҡатнашты. Фото: Илдар Аҡъюлов.