Бөгөн, 18 майҙа, Өфөнөң Совет майҙанындағы Миңлеғәле Шайморатов һәйкәле янында, Мөғин Нагаев исемендәге артиллерия дивизионын хәрби әҙерлеккә оҙатыу тантанаһы үтте. Сарала Башҡортостан Башлығы Радий Хәбиров ҡатнашты. – Бөгөн Өфөләге Совет майҙанынан сираттағы подразделение – артиллерия дивизионы хәрби әҙерлек урынына юлланды. Ул “Башҡортостан” башҡорт доброволецтар полкының бер өлөшө буласаҡ. Беҙ дивизион командирҙары менән уға легендар шайморатовсы, танкка ҡаршы батарея командиры, яҡташыбыҙ Мөғин Нагаев исемен биреү тураһында һөйләшеп килештек. Республика яугирҙәребеҙгә һәр яҡлап ярҙам күрһәтәсәк, барыһы менән дә тәьмин итәсәк, шулай итеп улар иғтибарҙы хәрби бурыстарҙы үтәүгә йүнәлтә аласаҡ. Егеттәргә ихтирам һәм хөрмәт менән ҡарайбыҙ. Уларҙың дошманға ҡаршы алышта ярҙам итеү тураһындағы мөһим ҡарарын ҡабул иткәндәре, хуплағандары өсөн туғандарына, яҡындарына рәхмәт белдерәбеҙ. Мөғин Нагаев һуғышты тулыһынса үтә, ике тапҡыр Советтар Союзы Геройы исеменә тәҡдим ителә, ул ваҡыттағы бөтә хәрби ордендар менән тиерлек бүләкләнә. Ул – Миңлеғәле Шайморатов ордены менән наградланған беренсе кеше. Республиканың лайыҡлы улының исемен беҙҙең артиллерия дивизионы яугирҙәре ғорурлыҡ менән йөрөтәсәк, тип ышанам. Мөғин Кәрим улы бер тапҡыр ҙа яраланмай һәм иҫән-һау әйләнеп ҡайта. Бөтә яугирҙәребеҙгә лә шуны уҡ теләйем. Эшләгеҙ, туғандар! – тине Радий Хәбиров. Сарала Мөғин Нагаев исемендәге артиллерия дивизионының командиры, подполковник Юрий Михайлович Спиваков сығыш яһаны. – Яугирҙәр исеменән һеҙҙең ышанысты аҡлаясағыбыҙҙы белдерәм. Ата-бабалар намыҫына тап төшөрмәҫбеҙ, хәрби бурысты үтәрбеҙ. Беҙҙең эшебеҙ изге, еңеү менән ҡайтасаҡбыҙ! – тине ул. Бөйөк Ватан һуғышы ветераны Мөғин Кәрим улы Нагаев — башҡорт кавалерия дивизияһының һуңғы геройы, Ҡыҙыл Байраҡ, Ленин, Ҡыҙыл Йондоҙ, I дәрәжә Ватан һуғышы, Александр Невский ордендары кавалеры. Ул Йәрмәкәй районының Һыуыҡкүл ауылында күп балалы ғаиләлә тыуған. 1942 йылдан 1945 йылға тиклем 112-се (16-сы гвардия Чернигов) Башҡорт кавалерия дивизияһы составында һуғыша, танкка ҡаршы батареяның взвод командиры була. 1942 йылдың йәйендә Башҡорт кавалерия дивизияһын һигеҙенсе корпус составында Брянск фронтына, Курск өлкәһенең Тербун районына марш менән ебәрәләр. Нагаев 1956 йылға тиклем армия сафында хеҙмәт итә. Һуңынан ветерандар ойошмаларында эшләй һәм 112-се Башҡорт кавалерия дивизияһы музейын булдырыуҙы тәҡдим итеүселәрҙең береһе була. Мөғин Кәрим улы 2020 йылда 102 йәшендә вафат була. Данлы үткәне булған илебеҙҙең улдарының, яҡташтарыбыҙҙың еңеп, иҫән-һау ҡайтыуын теләйбеҙ. Илшат ҮТӘЕВ, республиканың Хәрби дан музейы директоры: – Мөғин Кәрим улы вафат булғас, Башҡортостан Башлығы Радий Хәбиров уның исеме мәңгеләштереләсәге тураһында әйткәйне. Өфө ҡалаһының 160-сы лицейы, шулай уҡ Ғабдулла Амантай урамындағы сквер уның исемен йөрөтә. Донбассты яҡлаған егеттәргә Мөғин Кәрим улы Нагаев исеме ярҙам итер һәм уңыш килтерер, тип уйлайым. Бында уның Бөйөк Ватан һуғышын бер яраланыуһыҙ үтеүен дә билдәләп китергә кәрәктер. Бөйөк Ватан һуғышы батырҙарының исемдәрен хәрби берләшмәләргә биреү илһөйәрлек эшендә мөһим әһәмиәткә эйә, быуындар бәйләнешен нығыта һәм тарихи дөрөҫлөктө һаҡлауға булышлыҡ итә. ИРЕКМӘН, Әбйәлил районының Гусев ауылы: – Миңә 28 йәш, махсус хәрби операцияға үҙем теләп китәм. Быға тиклем төҙөлөштә эшләнем. Ғаиләм бар, яҡындарым ҡарарыма һағайып ҡараны, әммә мин үҙем барырға хәл иттем. “ВОЛЬНЫЙ”, Белорет ҡалаһы: – Беҙҙең райондан ете кеше бара. Миңә 33 йәш, улым бар, тимер юлында эшләй инем, унан бронь бирҙеләр. Күптән махсус хәрби операцияға барырға теләй инем. Бер туған һәм ике туған ағайым, дуҫтарым яуға китте, шуға ла мин дә юлландым. Ике көн Алкинда булдыҡ. Унда беҙҙе кейендерҙеләр, Һамарҙа тағы ла өҫтәп әйберҙәр бирәсәктәр. Дивизионға Башҡортостандың төрлө райондарынан ир-егеттәр йыйылған. 62, 64 йәшлек “олатайҙар” ҙа бар, иң йәш доброволецҡа – 20 йәш. Фото: "Башинформ".