“Музей-бер ҡасан да үлмәй торған тере тарих ул,” - ти татар яҙыусыһы Аяз Ғиләжев. Ысынлап та та музей - тарих төпкөлөнән килгән шаңдау, быуаттарҙы- быуаттарға тоташтырыусы рухи байлыҡтарыбыҙ үҙәге. Рәсәйҙә музейҙар Петр I заманында барлыҡҡа килә. Петр I тарафынан булдырылып Кунст-камера һуңынан хәҙерге Эрмитаждың нигеҙен тәшкил итә. Шул иҫәптән күп кенә провинциаль музейҙар асыла, 1864 йылда Өфөлә музей төҙөү бурысы ҡуйыла. Бөгөнгө көндә республикала 100-гә яҡын музей иҫәпләнә. Бөгөн ҡала һәм район үҙәктәрендә уранлашҡан музейҙарҙан башҡа, күп кенә мәктәптәрҙә лә музейҙар эшләй. Мәҫәлән, Баймаҡ районының Күсей ауылы мәктәбендә оҙаҡ йылдар мәктәп музейы уңышлы эшләп килә. Музейҙы ойоштороусыһы тарих уҡытыусыһы Әсмә Бикташева булһа, хәҙер уның етәксеһе Нәркәс Үтәғолова. Ҡасандыр бер мөйөштән генә башланған музей бөгөн тотош ике бүлмәне биләй. Күсей ауылы үҙенең күренекле шәхестәре менән киң билдәле. Шуға күрә бында Советтар Союзы Геройы Тәфтизан Миңлеғоловҡа, Башҡортостандың халыҡ шағиры Абдулхаҡ Игебаевҡа, Башҡортостандың халыҡ яҙыусыһы Таңсулпан Ғариповаға, Башҡортостандың атҡаҙанған сәнғәт эшмәкәре, билдәле балетмейстер Йәүҙәт Бикбирҙинға, "Әлифба"ның тәүге авторы Абдрахман Ғәлләмовҡа һәм башҡа күренекле шәхестәргә арналған стендтар бик күп. -Быуындар бәйләнеше, үткән тарихыбыҙҙы онотмау, киләсәк тураһында ҡайғыртыу, тыуған төбәк, уның күренекле шәхестәренә, туған телгә мөхәббәт, илһөйәрлек тойғоһо тәрбиәләүҙә музейҙың баһалап бөткөһөҙ роле ҙур. Ошонда уҡ Батырлыҡ дәрестәре үтә, бөгөн йәш быуынға илһөйәрлек һәм ватансыллыҡ сифаттары тәрбиәләүҙә музейҙарҙың әһәмиәте ҙур урын ала. Экспонаттарҙың ҡайһы берәүҙәре хатта республика музейҙарында ла осрамай, ә беҙҙә улар бар. Күсей ауылында табылған "Ирәндек айыуы" алтыны тураһында ла бик ҡыҙыҡлы мәғлүмәттәр тупланған. Ғөмүмән, беҙҙең музейға мәктәпте тамамлаусылар ҙа, оло йәштәгеләр ҙә, йәш быуын да бик теләп килә, үҙҙәренә кәрәкле мәғлүмәттәр менән таныша, шулай уҡ үҙҙәре лә төрлө әйберҙәр, документтар һәм экспонаттар тапшыра, -ти Нәркәс Илдар ҡыҙы. Әйткәндәй, был музейҙа шәхсән беҙ тапшырған өләсәйемдең балаҫ һуғыу әйберҙәре, ағас туҫтаҡ, тимер һөңгө һәм башҡа әйберҙәр бар. Автор фотоһы.