"Башбланкиздат " предприятиеһы етәксеһе Гөлсәсәк Әлибаева махсус хәрби операциялағы яҡташтарыбыҙға гуманитар йөктө алып барып тапшырҙы. Ошо хаҡта ул "Бәйләнештә" социаль селтәрҙәге сәхифәһендә уртаҡлашты. "9 май - Бөйөк Еңеүҙең 78 йыллығын тыныс булмаған Украина биләмәләрендә ҡаршы алырға тура килде. "Башбланкиздат " предприятиеһы етәксеһе булараҡ, гуманитар ярҙамды шәхсән үҙем Луганск Халыҡ Республикаһы ҡалалары мәктәптәренә һәм махсус операцияла ҡатнашҡан яҡташ һалдаттарыбыҙға алып барҙым. Тәрән йөкмәткеле осрашыуҙар, әһәмиәтле һөйләшеүҙәр, һалдаттар менән аралашыу, уларҙың күтәренке рухта булыуҙарына һоҡланыу һәм ғорурлыҡ уятты был мөһим миссиям. Эш сәфәрем осрашыуҙарҙан башланып китте. Генерал - майор Миңлеғәле Шайморатов исемендәге 22-се мәктәптә, Хәсәнов исемендәге 20-се "Краснолучская" мәктәптәрендәге ихлас мөнәсәбәттәр, фекер алышыуҙар, принтер, ҡағыҙҙар бүләк менән тәьмин итеү - йылы мөхит тыуҙырҙы. "Берҙәм Рәсәй" партияһы депутаты Сергей Викторович Серов менән осрашырға насип булды. Иң әһәмиәтлеһе - Луганск ҡалаһындағы "Добродия" икмәк комбинаты директоры Найден Зинаида Гавриловна менән хеҙмәттәшлеккә килешеү төҙөлдө.Дәүләт теле-радио компанияһының "Луганск - 24" каналында тура эфирға сығып, эшлекле әңгәмә ҡороу ҙа минең өсөн әһәмиәтле булды. 12 май - Луганск Халыҡ Республикаһы өсөн иң тантаналы байрамдарының береһе. 2014 йылда ул республика булып формалаша, Рәсәй Федерацияһына ҡушыла. Әлбиттә, был көндәге байрам мөхите күңелдә матур иҫтәлек булып ҡалды. Һуңғы көндәр "Шайморатов эҙҙәре буйлап" акцияһы менән тамамланды, Шайморатов һәйкәле асылыуының бер йыллығын билдәләнек. Мобилизация һалдаттарына Әхтәм Боҫҡонов биргән изге бетеүҙәрҙе үҙ ҡулым менән тапшырып, бурысымды үтәнем. Башҡортостан хәрби хәрәкәттәр ветерандары союзы вәкиле Тимерйән Рәжәпов миндә оло ихтирам уятты, уның ниәттәренең ни тиклем изге, мәртәбәле булыуына тик һоҡланырға ҡала. Луганск һәм Донецк халыҡ республикалары туғандаш халыҡтар янында булған уй-кисерештәрҙе ҡыҫҡаса яҙып бөтөрлөк түгел, әлбиттә. Тыныслыҡтың ниндәй ҡиммәткә эйә булыуын, уның ниндәй ҡорбан килтереүен, күпме әсәләрҙең күҙ - йәштәре түгелеүен, фильм аша түгел, ә үҙ йөрәгең аша кисереү бик аяныс һәм ҡыҙғаныс. Ләкин, тормош дауам итә...", - тип яҙҙы ул. Гөлсәсәк Әлибаеваның был ҡыйыу аҙымы һоҡландырыу тыуҙырҙы. Ошондай башҡорт ҡатын-ҡыҙҙарының саялағы һәр саҡ һоҡландыра. Фото: vk.com