Վրացական Georgian Airways ավիաընկերությունը չեղարկել է Թբիլիսի-Մոսկվա թռիչքները Երևանով տարանցիկ ճանապարհով՝ Վրաստանի և Ռուսաստանի Դաշնության միջև ուղիղ չվերթների վերականգնման մասին հայտարարությունից հետո։
«Մենք մայիսի 20-ից հետո չեղարկել ենք բոլոր տարանցիկ չվերթները»,- ՏԱՍՍ-ին հայտնել են ավիաընկերությունից։ Ճշտող հարցին, թե արդյոք ուղևորներին կվերադարձվի գնված տոմսերի համար գումարը, թե՞ դրա դիմաց ուղիղ չվերթ կտրամադրվի նույն ամսաթվերին, ավիաընկերությունից ասացին, որ դեռ որոշում չկա։ Նրանք նշել են, որ կոմերցիոն վարչությունը լուծում է «Էյր Սթեյջքոուչ» հայկական ավիաընկերության գնած տոմսերի հարցը Երևանով տարանցիկ թռիչքների համար, և մինչև օրվա վերջ ուղևորները տեղեկատվություն կստանան։
Միաժամանակ Georgian Airways-ը վստահեցրել է, որ Երևանով նախատեսված չվերթները, որոնք նախատեսված էին մինչև մայիսի 20-ը, կիրականացվեն։
Ավելի վաղ Վրաստանի Քաղաքացիական ավիացիայի գործակալությունը հայտնել էր, որ Georgian Airways-ը մայիսի 20-ից կսկսի կանոնավոր չվերթներ իրականացնել Թբիլիսի-Մոսկվա-Թբիլիսի երթուղով՝ շաբաթական յոթ անգամ հաճախականությամբ։ Նույն օրը երեկոյան ավիաընկերության կայքում բացվել է Մոսկվայի ուղղությամբ տոմսերի վաճառքը։ Միաժամանակ, վաճառքից անհետացան Air Stagecoach-ի տարանցիկ չվերթները Երևանով, որոնք նախկինում վաճառվում էին Georgian Airways-ի կայքում։
Հիշեցնենք, որ մայիսի 10-ին ՌԴ նախագահ Վլադիմիր Պուտինը հրամանագիր է ստորագրել մայիսի 15-ից Վրաստանի քաղաքացիների համար վիզային ռեժիմը վերացնելու մասին։ Մեկ այլ հրամանագրով նա չեղարկել է ռուսական ավիաընկերությունների թռիչքների և դեպի Վրաստան տուրերի վաճառքի արգելքը, որը գործում էր 2019 թվականից։ Երկուշաբթի օրը Վրաստանի ավիացիոն իշխանությունները Մոսկվա-Թբիլիսի երթուղով չվերթներ իրականացնելու թույլտվություն են տվել ռուսական «Ազիմուտ» ավիաընկերությանը։ Առաջին թռիչքը տեղի կունենա մայիսի 19-ին։ Georgian Airways-ը դարձավ երկրորդ ավիաընկերությունը, որը ուղիղ չվերթեր սկսեց Վրաստանի և Ռուսաստանի միջև։