Ишембай үҙәк район дауаханаһы хирургтары хеҙмәттән бушатылған махсус хәрби операция яугиренең умыртҡа һөйәгенән пуля алған. Был хаҡта үҙенең Телеграм-каналында республиканың һаулыҡ һаҡлау министры Айрат Рәхмәтуллин хәбәр иткән. Ведомство етәксеһе әйтеүенсә, хәрби февралдә ҡаты яраланған һәм аяҡ-ҡулдарын туңдырған. Уға Донецк Халыҡ республикаһы госпиталендә тәүге ярҙам күрһәтелгән. Һуңынан ирҙе Дондағы Ростов һәм Һамар дауаханаларына оҙатҡандар. Унда уның умыртҡа һөйәгендә, бил өлкәһендә пуля табылған, әммә урында нейрохирург булмау сәбәпле операция яһамағандар. - Хәрби хеҙмәттән бушатылғандан һуң яугир Ишембайға ҡайтҡан. Бында ул үҙәк район дауаханаһына мөрәжәғәт иткән. Пуляны интраоперация рентгены контроле аҫтында алып ташлағандар. Был алым хирургтарға операция ҡоралы менән аныҡ урынға етергә һәм минималь киҫелеш эшләргә ярҙам итә, - тип белдергән Айрат Рәхмәтуллин. Операция уңышлы үткән, әле пациент ҡәнәғәтләнерлек хәлдә. Фото Айрат Рәхмәтуллиндың шәхси сәхифәһенән.