ՀՀ քննչական կոմիտեի Սյունիքի մարզային քննչական վարչությունում ավարտվել է «Գորիս» ՔԿՀ-ում քրեական ենթամշակույթի դրսևորման վերաբերյալ նախաձեռնված քրեական վարույթի նախաքննությունը, հայտնում են ՔԿՀ-ից:
ՔԿ-ի փոխանցմամբ՝ «Գորիս» քրեակատարողական հիմնարկի 42-ամյա դատապարտյալը, հանդիսանալով, այսպես կոչված, «զոն նայող», ղեկավարել է քրեական ենթամշակույթ կրող խմբավորում:
Մասնավորապես՝ քրեակատարողական հիմնարկում պահվող անձանց նկատմամբ իրականացրել է վերահսկողություն, տվել է կոնկրետ հրահանգներ և հանձնարարականներ, կազմակերպել և վերահսկել է քրեական ենթամշակույթ կրող խմբավորման միջոցով, այսպես կոչված, «օբշակի» միջոցով ստացված անօրինական օգուտը կազմող գումարների հավաքագրումը, տարբեր կալանավորների ու դատապարտյալների անվամբ ընդունված հանձնուքները, արգելված տեխնիկական միջոցների, մասնավորապես՝ բջջային հեռախոսների՝ ապօրինի քրեակատարողական հիմնարկ ներկրելու եղանակները և այլն:
«Բացի այդ, վերջինս հրահանգել է չհամագործակցել քրեակատարողական հիմնարկի աշխատակիցների հետ՝ զգուշացնելով որևէ կալանավորի կամ դատապարտյալի կողմից աշխատակիցներին տեղեկություն հայտնելու դեպքում «պատժել», քրեակատարողական հիմնարկ նոր տեղափոխված կալանավորներին և դատապարտյալներին սահմանված և ճանաչված վարքագծի կանոնների բացատրման գործընթացը կազմակերպելու վերաբերյալ տվել է առաջադրանքներ»,- ասված է հաղորդագրությունում:
Քննությամբ պարզվել է, որ անձին օժանդակել են նաև այլ դատապարտյալներ: Քրեական վարույթով անուղղակի ներգրավված է նաև Քաջարան համայնքի ղեկավար Մանվել Փարամազյանը:
ՔԿ-ից հայտնում են, որ «Քննությամբ հիշյալ դատապարտյալը ՔԿ հիմնարկում պահվող մեկ այլ դատապարտյալից տեղեկություն է ստացել և նրա հետ քննարկել վերջինիս ազգականի վերաբերյալ դատական գործով ամբաստանյալ, Սյունիքի մարզի Քաջարան համայնքի ղեկավար Մ․Փ․-ի դեմ ցուցմունք տված, նույն հիմնարկ տեղափոխված և այդ պահին խցում գտնվող անձի չընդունված վարքագծի վերաբերյալ և վերջինիս քրեակատարողական հիմնարկում համապատասխան վերաբերմունքի արժանացնելու նպատակով նրա խցակիցներին տվել հրահանգներ»:
Քրեական վարույթով հայտարարվել է նախաքննության ավարտ, և վարույթի նյութերը, մեղադրական եզրակացությամբ, ուղարկվել են դատարան: