Башҡортостан Республикаһының милли архивында “Рауил Бикбаев” сайтын асыуға арналған тантаналы сара үткән. Интернет-ресурста билдәле шағир, ғалим-филолог, публицист, йәмәғәт эшмәкәре Рауил Бикбаевтың тормошо, йәмәғәт, ғилми һәм ижади эшмәкәрлеге менән бәйле материалдарҙың мультимедиа архивы презентациялары тәҡдим ителде, тип хәбәр иттеләр ведомствоның матбуғат хеҙмәтенән. Был мультимедиа архивы Башҡортостан Башлығының 2019 йылдың 1 октябрендәге “Башҡортостандың халыҡ шағиры Рауил Төхвәт улы Бикбаевтың хәтерен мәңгеләштереү тураһында”ғы Указы нигеҙендә булдырылған, оҙаҡ ваҡыт дауамында архивсылар бының өсөн документтар, аудио-видеоматериалдар йыйыу буйынса ҙур эш башҡарған. Рауил Бикбаевтың шәхси архивынан документтар уның ҡатыны Фәриҙә Бикбаева тарафынан милли архивҡа дәүләт һаҡлауына тапшырыла. Фондҡа халыҡ шағирының ижади, ғилми, йәмәғәт эшмәкәрлеге материалдары, шул иҫәптән ҡулъяҙмалар, баҫылған китаптар, фотоһүрәттәр индерелгән. Сайтта урынлаштырылған документтар мәктәп уҡыусылары, студенттар, тикшеренеүселәр һ.б. өсөн баһалап бөткөһөҙ ҡиммәткә эйә. Сығанаҡ: vk.com/minkultury_rb