Хәтерләйһегеҙҙер, сифатлы, модала булған сит ил кейеменә һоҡланып туймай инек, ә бит бындай кейемде үҙебеҙҙә лә етештереп була. Хәйер, хәҙер баҙарҙы Рәсәй кейеме яулай бара. Бөгөн Ишембай районында йәки “Алға” махсус иҡтисади зонала нәҡ ошондай сифатлы һәм брендлы кейем етештергән, заманса технологиялар буйынса эшләгән “ZASPORT” компанияһы фабрикаһы асылды. Улай ғына ла түгел, бында тегелгән кейемдәрҙе Олимпия уйындарында ҡатнашасаҡ Рәсәй йыйылма командаһы ла кейем йөрөйәсәк, компания менән илдең Олимпия комитеты араһында был йәһәттән килешеү төҙөлгән. Фабриканы тантаналы асыуҙа мәртәбәле ҡунаҡтар ҙа ҡатнашты, республика Башлығы Радий Хәбиров, әлеге компанияны ойошторған Анастасия Задорина, цехтарҙа барған эштәр менән танышып, коллективҡа уңыштар теләне һәм артабанғы үҫеш, хеҙмәттәшлек, шарттар буйынса фекер алышты. Сарала Рәсәй Олимпия комитеты президенты Станислав Поздняков та сәләмләп, был компанияла етештерелгән тауарҙың спортсылар өсөн уңайлы, сифатлы булыуын билдәләне. Шулай уҡ фабрика продукцияһы менән танышырға фехтование буйынса Олимпиада чемпиондары Аделина Заһитова, Тимур Сафин, бокс буйынса донъя чемпионы Азалия Әминева, төрлө кимәлдәге ярыштар еңеүсеһе булған башҡа билдәле спортсылар килде. Видеобәйләнеш аша Рәсәй Дәүләт Думаһы рәйесе урынбаҫары Александр Жуков та ҡотлау һүҙҙәрен еткерҙе. Тантаналы сара ваҡытында Радий Фәрит улы компанияның уңышлы эш башлауын билдәләне. – Башҡортостанда ошондай заманса ҡорамал менән тәьмин ителгән, яҡшы эш шарттары, юғары хеҙмәт хаҡы булған фабрика барлыҡҡа килгәненә шатмын. Был сираттағы яңы предприятие ғына түгел, ә республикала еңел сәнәғәт өлкәһендә алға табан ҙур аҙым, – тине етәксе һәм компания етәкселегенә нәҡ беҙҙең төбәкте һайлаған өсөн рәхмәт әйтте. Анастасия Задорина үҙ сиратында республикала бизнес, сәнәғәт үҫешһен өсөн булдырылған шарттарға, асыҡ хеҙмәттәшлеккә һоҡланыуын белдерҙе. – Бөгөн беҙҙең компания тарихында мөһим ваҡиға. Башҡортостандың ярҙамы менән етештереү күләме күпкә арта, көҙ үк был производствоны тулы көсөнә эшләтеп, тәүлегенә 2 250 тауар етештерә аласаҡбыҙ, – тине ул. Компанияның етештереү ҡеүәте арта барыуын Александр Жуков та билдәләне. – “ZASPORT” импортҡа алмаш буйынса уңышлы алға бара, “Алға” махсус зонаһында заманса фабрика барлыҡҡа килеүе – быға асыҡ дәлил. Компанияның яңы проекттары ла бар, шуға ярҙам итергә, шарттар тыуҙырырға кәрәк, уңыштар теләйем! – тигән теләктәр яңғыраны. Предприятиеның генераль директоры Николай Ступаков белдереүенсә, фабрикала кейем тегеүҙең бөтә этаптары ла, шул иҫәптән тегеүгә тауар әҙерләү, тегеү, кейемгә һүрәт баҫыу, сублимация цехтары ҡаралған. Бынан тыш, тәжрибә үткәреү бүлеге бар, унда белгестәр яңы кейем төрҙәре булдырыу өҫтөндә эшләйәсәк. Яҡын киләсәктә компания фабрика майҙанында үҙенең сауҙа йортон да булдырырға планлаштыра – бында иһә тауар менән танышып, кейем һатып алырға мөмкин буласаҡ. Фабриканың икенсе ҡатында хеҙмәткәрҙәр өсөн ятаҡ эшләнгән. Бында туҡланыу шарттары ла ҡаралған – иртәнге, төшкө, киске аштарҙы алып киләләр һәм бушлай ашаталар. Әйткәндәй, Радий Хәбиров махсус иҡтисади зонала ошондай дөйөм ашхана ойоштороу мәсьәләһен дә күтәрҙе. “Алға”, ғөмүмән, Башҡортостанда ғына түгел, ил кимәлендә алдынғы сәнәғәт берәмеге булып тора. Республика етәкселеге уны үҫтереүгә яҡшы шарттар тыуҙыра. – Бынан өс йыл элек “Алға” махсус иҡтисади зонаһын асҡанда уның был тиклем йылдам үҫерен күҙ алдына ла килтермәгәйнек. Ә бөгөн унда тағы бер производство эшләй башланы. Башҡортостанда, ғөмүмән, еңел сәнәғәттең күрһәткестәре яҡшы, – тине Радий Хәбиров. Белешмә: “ZASPORT” компанияһы 2012 йылда ойошторолған. Әлеге фабриканы төҙөү буйынса 2020 йылда килешелде. Проекттың партнерҙары - “Аркада” һәм “Эш кейемдәре комбинаты” йәмғиәттәре. Төҙөлөшкә 400 миллион һум инвестиция йәлеп ителгән. Сәнәғәт берәмегенең майҙаны – дүрт мең квадрат метр. Фабрика тулы көсөнә эшләй башлағас, бында йылына 560 мең дана тауар (кейем) етештереү ҡаралған. Фабрикала йәмғеһе 310 белгес, шул иҫәптән 200 тегенсе эшләй. Хеҙмәт хаҡы айына, сменаға ҡарап, 150 мең һумға тиклем барып етеүе мөмкин. Фотолар Башҡортостан Башлығы сайтынан алынды.