Мондый бурычны Русия Хезмәт министрлыгы төбәкләр алдына системаны комплекслы модернизацияләү һәм «Демография» гомумдәүләт проекты кысаларында куйды. Хезмәтне үзгәртеп коруның беренче этабы быел гыйнварда узды: беренчеләрдән булып Уфа халыкны эш белән тәэмин итү үзәге һәм Башкортстан башкаласының 7 район филиалы берләште. 2 майда республика халыкны эш белән тәэмин итү үзәгенә Башкортстанның калган 10 районара мәшгульлек үзәге кушылды.- Барлык ресурсларны бердәм үзәккә туплау безгә эшне оптимальләштерергә һәм мәшгульлек өлкәсендә оператив рәвештә карарлар кабул итәргә мөмкинлек бирәчәк, — дип билгеләп үтте барлык мәшгульлек хезмәтләрен бердәм үзәккә берләштерүнең өстенлекләрен гаилә, хезмәт һәм халыкны социаль яклау министры Ленара Иванова. - Нәтиҗәдә безнең гамәлләр нәтиҗәлерәк булачак, мәшгульлек үзәкләре тарафыннан күрсәтелә торган хезмәтләрнең саны да, сыйфаты да артачак. Шуны аңларга кирәк: модернизация биналарны ремонтлау белән генә чикләнми. Иң беренче чиратта, бөтен мәшгульлек хезмәте системасы үзгәрә. Без яңа дәрәҗәгә чыгабыз һәм республика предприятиеләре өчен квалификацияле профессиональ кадрлар эзләүдә заманча кадрлар үзәгенә, юл күрсәтүчегә әвереләбез.3 ел элек башланган мәшгульлек хезмәтен модернизацияләү 7 төп юнәлешне үз эченә ала: бу бердәм стандартлар, мәшгульлек үзәкләре белгечләрен яңадан укыту, хезмәтне санлаштыру, клиентка адреслы якын килү, офисларны үзгәртеп кору, хезмәтләр һәм сервислар линиясен киңәйтү, тормыш һәм бизнес-ситуацияләрне хәл итүгә комплекслы якын килү.- Хәзер мәшгульлек үзәкләренең күпчелек хезмәтләре санлаштырылган һәм «Русия эше» порталы ярдәмендә күрсәтелә, — дип сөйли республика халыкны эш белән тәэмин итү үзәге директоры Ридан Әхъямов. - Беренчедән, эш эзләү һәм персонал сайлау буенча бу платформа бушлай, икенчедән, санлаштыру ярдәмендә без хезмәтләребезне экстерриториаль принцип буенча күрсәтә алабыз, ягъни эш бирүченең конкрет яшәү урынына яки эш бирүче урнашкан урынга бәйләмичә. Дәгъвачы һәм эш бирүче белән булган һәр очракны без аның тормыш яки бизнес-ситуацияләреннән чыгып карыйбыз.Исегезгә төшерәбез, 2019 елда Башкортстан Русия Федерациясенең 16 пилот субъекты арасына керде, анда мәшгульлек хезмәтен комплекслы модернизацияләү проекты старт алды. Ул мәшгульлек үзәкләренең бөтен челтәрен бер үк вакытта яңартуны, гражданнар һәм эш бирүчеләр өчен яңа сервислар һәм хезмәтләр комплексларын кертүне күздә тота, аларны халыкны эш белән тәэмин итү үзәгенә шәхси визит белән дә, дистанцион рәвештә дә алырга мөмкин.Яңартылган мәшгульлек үзәкләре хәзер «Русия эше» кадрлар үзәкләре исемен йөртә. Бүген мондый үзәкләр Стәрлетамак, Нефтекама һәм Уфа шәһәренең Орджоникидзе районында эшли. 2023 елда Күмертау шәһәрендә ремонт эшләрен тәмамлау планлаштырыла.