Газ тағы ла күберәк өйҙәргә етте!

Бөгөн Хөкүмәттең аҙналыҡ оператив кәңәшмәһендә республикала газ үткәреү һәм йорт биләмәләре сигенә тиклем газ килтереп еткереү программаларының яҡынса йомғаҡтары тикшерелде. Хәтерегеҙгә төшөрәбеҙ, 2020 йылда Башҡортостан һәм “Газпром” 2025 йылға тиклем төбәктә газ һуҙыу һәм газ менән тәьмин итеүҙе үҫтереү программаһын раҫланы. Ул ҡасаба-ара һәм ҡасаба эсендәге газ үткәргестәр төҙөүҙе, газ бүлеү станцияларын яңыртыуҙы һәм реконструкциялауҙы күҙ уңында тота. Программаның актуаль варианты Башҡортостанда 180 тораҡ пунктҡа газ үткәреү өсөн өҫтәмә 1 мең километрҙан ашыу ҡасаба-ара һәм 1,1 мең километр ҡасаба эсе газ үткәргестәрен төҙөүҙе күҙ уңында тота. Программаның дөйөм хаҡы 27 миллиард һумға тиклем артты. – Иң мөһим объекттарҙың береһе – Бөрйән районында 61,8 километр оҙонлоҡтағы ҡасаба-ара газ үткәргес. Уны 2023 йылдың сентябрендә файҙаланыуға тапшырыу алты тораҡ пунктты газ менән тәьмин итергә мөмкинлек бирәсәк, – тип хәбәр итте “Газпром төбәк-ара газ Өфө” яуаплылығы сикләнгән йәмғиәтенең генераль директоры Альберт Лоҡманов. – Йыл аҙағына тиклем Учалы һәм Күгәрсен райондарында ла газ үткәргестәрен тапшырырға планлаштырабыҙ. Хәтерегеҙгә төшөрәбеҙ, 2021 йылда Рәсәй Президенты Владимир Путин йорт биләмәләре сигенә бушлай газ үткәреүҙе – социаль газ үткәреү күҙ уңында тотҡан законға ҡул ҡуйҙы. Газ үткәргесте ер участкалары сиктәренә еткереү өсөн берҙәм газ үткәреү операторы яуаплы. – Программа тормошҡа ашырыла башлағандан алып беҙ 38,5 меңдән ашыу ғариза ҡабул иттек. Газ бүлеү селтәрҙәре 32,4 мең йорттоң сигенә еткерелде, уларҙың 23,8 меңендә зәңгәр яғыулыҡ бар, – тине Альберт Лоҡманов. – Ә беҙҙең эш барышында бөтәһе 46,2 мең йортҡа газ үткәреү мөмкинлеге булдырылды. 2022 йылдың аҙағында Рәсәй Президенты биләмә сигенә тиклем газ килтереү программаһын тормошҡа ашырыу ваҡытын оҙайтты. Бынан тыш, программа социаль объекттарға – медицина һәм белем биреү ойошмаларына киңәйтелде. Башҡортостанда 11 дөйөм белем биреү һәм туғыҙ мәктәпкәсә белем биреү учреждениеһына газ үткәреү өсөн 20 ғариза ҡабул ителде. Республиканан газ үткәреүгә сертификаттар тапшырыуҙы тормошҡа ашырыуҙа ярайһы ҙур ярҙам булды. – Бөтәһе 8 434 сертификат ҡабул иттек, шуларҙың 7 698-е буйынса эштәр тамамланды ла инде, – тип өҫтәне Альберт Лоҡманов. – 2023 йылдың 1 ғинуарынан сертификаттарҙың номиналы 100 мең һум тәшкил итә. Льготалы тоташтырыу мөмкинлеге мобилизацияланған яугирҙәргә һәм уларҙың ғаилә ағзаларына ҡағыла. Башҡортостан Башлығы төбәктә газ үткәреү программаларын тормошҡа ашырыуҙың һөҙөмтәлелеген юғары баһаланы. – Беҙ, ысынлап та, “Газпром” менән килешеүҙе яңырттыҡ. Уға ҙур күләмдә инвестициялар һалынған, – тине Радий Хәбиров. – Был 2025 йылдың аҙағына республикабыҙға газ үткәреү кимәлен күтәрергә мөмкинлек бирәсәк. Фото: pro-dachnikov.com