Хөкүмәттең бөгөнгө аҙналыҡ кәңәшмәһен Башҡортостан Башлығы Радий Хәбиров кадр тәғәйенләнештәрен иғлан итеүҙән башланы. Шулай Рәсәй Президенты Владимир Путиндың 10 майҙағы указы менән Раил Шәйҙуллин Башҡортостандың Юғары суды рәйесе итеп тәғәйенләнде. Билдәле булыуынса, был вазифа 2021 йылдың ноябренән буш ҡалды. Ул саҡта ковидтан һуң өҙлөгөү сәбәпле республиканың баш судьяһы Земфира Латипова вафат булғайны. 12 майҙа Радий Хәбиров үҙенең указы менән Башҡортостан Хөкүмәте аппараты етәксеһе Азамат Абдрахмановты вице-премьерға тиклем күтәрҙе. Шул уҡ ваҡытта төбәк Башлығы вице-премьер статусын Мәскәүҙәге тулы хоҡуҡлы вәкиллек етәксеһенән алды, һөҙөмтәлә вице-премьер вазифаларының дөйөм һаны элеккесә ҡалды. Николай Ельников Өфө районының яңы башлығы итеп тәғәйенләнде, ә Рәсәй Ауыл хужалығы министрлығы бойороғо менән Руслан Байкиев Башҡортостан Республикаһы буйынса ветеринария, фитосанитария хеҙмәте вазифаһын башҡарыусы итеп тәғәйенләнде. Радий Фәрит улы бөтә яңы етәкселәргә уңыш теләне. Һаулыҡ һаҡлау министры урынбаҫары Азат Рәхмәтуллин коронавирус буйынса һуңғы яңылыҡтар менән таныштырҙы. Һуңғы аҙнала сир 926 кешелә асыҡланған, был алдағы аҙна менән сағыштырғанда 14 процентҡа әҙерәк. Ковид-госпиталдәрҙә коронавирусты дауалау өсөн 265 урын әҙерләнгән, уларҙың 12 проценты буш. Әлеге ваҡытта 118 кеше дауаханала, 1325 кеше өйөндә дауалана. Башҡортостанда “Сәләмәт республика - сәләмәт төбәк” акцияһы дауам итә. Был аҙнала күсмә бригадалар эшен Шишмә, Архангел, Ҡариҙел, Асҡын, Стәрлетамаҡ, Дыуан, Шаран һәм Учалы райондарында дауам итәсәк. Күсмә бригадаларҙа Республика клиник дауаханаһының, республика кардиология үҙәгенең медицина модулдәре, күсмә комплекстар һәм республика медицина ойошмаларының фельдшер-акушерлыҡ пункттары эшләй. Азат Рәхмәтуллин һүҙҙәренсә, 17 апрелдән 15 майға тиклем акцияла белгестәр 24 680 кешене ҡабул иткән, 53 тораҡ пунктта тикшереүҙәр үткәрелгән. Республиканың ғәҙәттән тыш хәлдәр буйынса дәүләт комитеты рәйесе Фәрит Ғүмәров Башҡортостанда махсус янғынға ҡаршы режимды оҙайтырға тәҡдим итте. Ул махсус ҡарар булғансы дауам итәсәк. Комитет рәйесе белдереүенсә, уҙған аҙнала республиканың Белорет районында бер урман янғыны сыҡҡан. Ут ялмап алған майҙан 3,2 гектар тәшкил иткән. Бынан тыш, дөйөм алғанда 9,8 гектар майҙанда ҡоро үлән яныуҙың 14 осрағы теркәлгән. Әлеге ваҡытта төбәктә һүндерелмәгән янғындар юҡ. Республика Башлығы Радий Хәбировтың ҡушыуы буйынса, Башҡортостандың рәсми делегацияһы Ҡаҙағстанға Kazakhstan Machinery Fair машина эшләү һәм металл эшкәртеү буйынса халыҡ-ара махсуслаштырылған күргәҙмәгә барҙы. Башҡортостан Хөкүмәте Премьер-министрының беренсе урынбаҫары - иҡтисади үҫеш һәм инвестиция сәйәсәте министры Рөстәм Моратов сәфәр һөҙөмтәләре тураһында хәбәр итте. Рөстәм Моратов һүҙҙәренсә, форум майҙансығында Ҡаҙағстан вәкилдәре менән 100-ҙән ашыу осрашыу үткән, Башҡортостандың иҡтисади һәм етештереү ҡеүәте менән таныштырыу саралары уҙғарылған. Бынан тыш, республика предприятиелары ла үҙ продукцияһын тәҡдим иткән. Осрашыуҙар һәм өлгәшелгән килешеүҙәр йомғаҡтары буйынса ҡабул ителгән ҡарарҙар артабан хеҙмәттәшлек итеү план-графигына ярашлы әҙерләнә. Ҡаҙағстан яғы Башҡортостанға тармаҡтар буйынса бизнес-миссияны әүҙемләштерергә тәҡдим итте. Һөҙөмтәлә ағымдағы йылдың сентябренә тиклем өс бизнес-миссия үткәреү тураһында ҡарар ҡабул ителгән. Уларҙың һәр береһендә Башҡортостандың 30-40 компанияһы ҡатнашыр тип көтөлә. Фото: "Республика Башкортостан".