Թուրքիայի նախագահական և խորհրդարանական ընտրությունների համար բացված ընտրատեղամասերը փակվել են տեղական ժամանակով ժամը 17:00-ին (ՀՀ ժամանակով՝ 18:00):
Թուրքիայում այսօր ընտրում են երկրի 13-րդ նախագահին ու խորհրդարանի նոր կազմը։ Քաղաքացիները ինը ժամվա ընթացքում (08:00-ից 17:00-ն) պետք է ընտրեն երկրի ղեկավարին, որը ղեկավարելու է երկիրը առաջիկա հինգ տարիներին, և խորհրդարանի 600 պատգամավորի։
Հանրապետությունում և արտերկրում տեղադրվել էր 191 հազար 884 քվեատուփ։ Քվեարկության ավարտից հետո նախ կհաշվարկվեն նախագահի թեկնածուներին տրված ձայները։ Ընտրելու իրավունք ուներ Թուրքիայի 64 միլիոն քաղաքացի,֊ հաղորդում է Պետական TRT֊ն։ Կայքի փոխանցմամբ՝ քվեարկությունը 81 նահանգներում ընթացել է առանց էական ընդհատումների կամ միջադեպերի՝ անվտանգության խիստ ուժեղացված միջոցառումների պայմաններում: Թուրքիայի գործող նախագահ Ռեջեփ Թայիփ Էրդողանը ավանդաբար քվեարկել է Ստամբուլում, իսկ նրա մրցակից ընդդիմադիր թեկնածու Քեմալ Քըլըչդարօղլուն՝ Անկարայում։
Ինչպես հայտնել ենք՝ նախագահի համար հիմնական պայքարը ծավալվում է հանրապետության ներկայիս ղեկավարի՝ «Հանրապետական դաշինքի» միասնական թեկնածու Ռեջեփ Թայիփ Էրդողանի և ընդդիմադիր «Ժողովրդական դաշինքի» միասնական թեկնածու Քեմալ Քըլըչդարօղլուի միջև։
Նշենք, որ նախագահական ընտրությունների առաջին փուլում հաղթանակ տանելու համար հարկավոր է, որ թեկնածուն հավաքի ձայների 50 տոկոսը։ Հակառակ պարագայում մայիսի 28-ին տեղի կունենա նախագահի ընտրությունների 2-րդ փուլը, որին կմասնակցեն 1-ին փուլում ամենաշատ ձայներ հավաքած երկու թեկնածուները, իսկ կհաղթի առավելագույն քվե ստացած գործիչը։ Էրդողանից և Քըլըչդարօղլուից բացի, ընտրություններում մասնակցում է նաև ATA դաշինքից Սինան Օղանը։ «Հայրենիք» կուսակցությունից (Memleket Partisi) ղեկավար Մուհարեմ Ինջեն ընտրություններից 3 օր առաջ՝ մայիսի 11-ին հայտնեց թեկնածությունը հանելու մասին։
Խորհրդարանական ընտրություններին մասնակցում է 32 կուսակցություն՝ միավորված տարբեր դաշինքներում։
Ընտրություններին արտերկրում արդեն մասնակցել է 3,4 մլն ընտրողներից 1,7 մլն-ը, ինչը ավելին է նախորդ ընտրությունների 1,4-ի համեմատ։ Քվեարկությունը կավատրվի ժանը 17։00-ին, ինչից անմիջապես հետո կսկսվի քվեների հաշվարկը։