Հայաստանի ԱԳ նախարար Արարատ Միրզոյանը ԱՄՆ պետքարտուղարի Եվրոպայի և Եվրասիայի հարցերով տեղակալի պաշտոնակատար Դերեկ Հոգանին պատմել է Հայաստանի տարածքի դեմ Ադրբեջանի ԶՈւ ագրեսիվ գործողությունների հետևանքով ստեղծված իրավիճակի մասին։
ՀՀ ԱԳՆ մամուլի ծառայությունից հայտնում են, որ հեռախոսազրույցի ընթացքում Միրզոյանն իր զրուցակցին ներկայացրել է Հայաստանի ինքնիշխան տարածքի դեմ Ադրբեջանի ԶՈւ սադրիչ և ագրեսիվ գործողությունների արդյունքում վերջին օրերին ստեղծված իրավիճակը։
Նախարարն ընդգծել է, որ այս գործողությունները նպատակ ունեն ձախողել խաղաղ բանակցությունները շարունակելու ջանքերը։ Կողմերը մտքեր են փոխանակել նաև Հայաստանի և Ադրբեջանի միջև հարաբերությունների կարգավորման, Լեռնային Ղարաբաղի ժողովրդի իրավունքների և անվտանգության ապահովման շուրջ։ Հայաստանի և Ադրբեջանի սահմանին լարվածության նոր փուլը սկսվել է մայիսի 11-ին, երբ, ըստ ՀՀ պաշտպանության նախարարության տեղեկատվության, ադրբեջանական զինուժը սկսել է գնդակոծել Գեղարքունիքի մարզի Սոթք գյուղի մերձակայքում գտնվող հայկական դիրքերը՝ հրետանուց և ականանետերից։
Առավոտյան Հայաստանի պաշտպանության նախարարությունը հայտնել է, որ ժամը 10:25-ի դրությամբ Սոթքի մոտ վիրավորված հայ զինծառայողների թիվը հասել է չորսի, նրանց կյանքին վտանգ չի սպառնում։ Մայիսի 12-ին՝ ժամը 10:00-ին, Սոթքի վրա ադրբեջանական անօդաչու թռչող սարքերի հարձակման հետևանքով ևս երկու հայ զինվոր է վիրավորվել։ Մայիսի 12-ի ուշ երեկոյան Հայաստանի պաշտպանության նախարարությունը հայտնել է մեկ զոհի և երկու վիրավորի մասին ադրբեջանական զինուժի գնդակոծության հետևանքով։ Ադրբեջանական կողմը հայտնել է փոխհրաձգության հետևանքով երկու զոհի և մեկ զինվորի վիրավորվելու մասին։