Belarus prezidenti Aleksandr Lukaşenko bu gün, mayın 14-də keçirilən Dövlət Rəmzləri Gününün qeyd edilməsinə qatılmayıb. Belarusun “Naşa Niva” qəzeti buna diqqət çəkib.
Səhər Belarus prezidentinin saytında Aleksandr Lukaşenkonun Dövlət Rəmzləri Günü münasibətilə təbriki dərc olunub. Lakin tədbirdə prezidentin əvəzinə baş nazir Roman Qolovçenko bayram münasibətilə müraciəti oxuyub.
Mayın 13-də “Motolko Help” və “Euroradio” xəbər verir ki, Aleksandr Lukaşenkonun korteji Respublika Kliniki Tibbi Mərkəzin binasına gəlib. KİV-in məlumatına görə, kortej iki saata yaxın xəstəxanada qalıb.
Bu arada “Naşa Niva” mənbələrə istinadən xəbər verib ki, cənab Lukaşenkoya yaxın olanlar arasında prezidentdə virus xəstəliyi olması ilə bağlı versiya yayılır. İddialara görə, son günlər onun ətrafından da bir neçə nəfər xəstələnib.
Həmin gün Belarusun Zerkalo.io nəşrinin jurnalisti Belarus prezidentinin mətbuat xidmətinə zəng edərək Aleksandr Lukaşenkonun vəziyyəti ilə maraqlanıb. Cavabında ona deyiblər: "Bəli, hər şey qaydasındadır, hər şey yaxşıdır". Nə üçün planlaşdırılan tədbirlərə qatılmadığını soruşduqda, mətbuat xidməti cavab verib ki, cənab Lukaşenkonun “kifayət qədər sıx qrafiki var, o cümlədən sənədlərlə işləyir”.
Aleksandr Lukaşenko sonuncu dəfə mayın 9-da ictimaiyyət qarşısına çıxıb. Əvvəlcə Moskvada Qələbə Paradında iştirak edib. Eyni zamanda, Belarus prezidenti Kremldən MDB ölkələrinin liderləri ilə Aleksandr bağı boyunca gəzməyib. Naşa Niva qeyd edir ki, o, elektromobillə aparılıb.
O, Kremldəki qeyri-rəsmi səhər yeməyində iştirak etməyib. Rusiya prezidentinin mətbuat katibi Dmitri Peskov izah edib ki, Belarus lideri Minskdəki hadisələrə görə “mümkün qədər tez oradan uzaqlaşmalıdır”. Daha sonra Aleksandr Lukaşenko Belarus paytaxtının Qələbə meydanındakı abidənin önünə gül qoyma mərasimində iştirak etsə də, təntənəli çıxış etməyib.