Өфө ҙур форумға әҙерләнә

Башҡортостан Республикаһы Хөкүмәте Премьер-министры Андрей Назаров Петербург халыҡ-ара юридик форумы барышында «Комсомольская правда» баҫмаһына интервьюһында Башҡортостанда үтәсәк Рәсәй һәм Беларусь төбәктәре форумы хаҡында һөйләне. - Өфө – Рәсәйҙә Төбәктәр форумын ҡабул иткән дүртенсе ҡала. Быға тиклем ул Мәскәү, Санкт-Петербург һәм Сочи ҡалаларында үтте. Башҡортостандың күп һанлы ҡунаҡтар ҡатнашлығында ҙур саралар уҙғарыу тәжрибәһе бармы? - «Рәсәй - Беларусь» юбилей форумы – илдәр араһындағы мөнәсәбәттәрҙе һаҡлау һәм үҫтереү менән бәйле ҙур сара. Форум Башҡортостан Башлығы Радий Хәбиров башланғысы менән үткәрелә. Уның башланғысын Федерация Советынан коллегалары хупланы, шуның өсөн беҙ уларға бик рәхмәтлебеҙ. Беҙҙә иң юғары кимәлдәге саралар уҙғарыу өсөн әҙерлекле инфраструктура бар. 2021 йылда «Йәш профессионалдар» милли чемпионатының финалын, Бөтә донъя фольклориадаһын, былтыр «Минең документтарым» Бөтә Рәсәй дәүләт хеҙмәттәре үҙәктәре форумын һ.б. ҡабул иттек. Был форум да иң күләмлеләрҙең береһе буласаҡ. Беҙ Федерация Советына уның программаһына ҡайһы бер эшлекле, презентацияға ҡоролған һәм мәҙәни саралар өҫтәргә тәҡдим иттек, беҙҙең тәҡдимдәр хуплау тапты. Беҙҙә уҙған форум барышында 10 йыллыҡ эшмәкәрлеккә йомғаҡ яһаласаҡ, илдәребеҙҙең үҙ-ара килешеп эш итеүе һәм үҫеш перспективалары тикшереләсәк. - Был ваҡиғаға ҡасан әҙерләнә башланығыҙ? - Өфөнөң форумды ҡабул итәсәге хаҡында былтыр билдәле булды. Күләмле сараларға әҙерлек тәжрибәһенә эйә булғанға күрә, эштең билдәле бер өлөшөн алдан үткәреү кәрәклеген аңлай инек. Тәү сиратта, майҙансыҡтар һайларға һәм Федерация Советы, Белоруссиялағы коллегаларыбыҙ менән бергә дөйөм программаны билдәләнек. Ойоштороу комитеты булдырылды, ултырыштар Мәскәүҙә, Минскиҙа һәм Башҡортостанда үтте. Май аҙағында Өфөлә һуңғы ултырыш үтәсәк, унда әҙерлеккә йомғаҡ яһаласаҡ. - Төбәктәр форумын уҙғарыу урыны итеп Башҡортостандың баш ҡалаһын һайлау республикаға ҡыҙыҡһыныу артыуын аңлатамы? - Башҡортостанға ҡыҙыҡһыныу һиҙелерлек артты. Быны республикаға килеүсе туристар һаны (былтыр 2 миллион самаһы кеше) һәм беҙҙең сараларҙа – Халыҡ-ара бизнес аҙналығында, “Урал аръяғы” Бөтә Рәсәй инвестиция һабантуйында һәм башҡаларҙа 50-нән ашыу илдең ҡатнашыуы ла раҫлай. - Беларусь менән Башҡортостан ниндәй өлкәләрҙә тығыҙ хеҙмәттәшлек итә? - Тейешле килешеүгә ҡул ҡуйылды, Башҡортостан һәм Беларусь төрлө өлкәләрҙә әүҙем эш алып бара. Тауар әйләнеше үҫә, төп йүнәлештәр – фәнни-техник һәм юғары технологик изделиелар, атап әйткәндә, пилотһыҙ осоу аппараттары етештереү. Икенсе йүнәлеш – сауҙа-сәнәғәт. Тағы ла бер перспективалы йүнәлеш – туризм. Беҙ «Башҡортостанда оҙон ғүмерлелек. Туризм» программаһын киңәйттек. Хәҙер программа яңыртылды һәм «Башҡортостан-белорус оҙон ғүмерлелеге. Туризм» тип атала. Ул Башҡортостанға һәм Белорусь Республикаһына сәйәхәткә сығырға теләгән өлкән быуын граждандарына льготалар һәм ташламалар бирә. Туристарҙың тәүге төркөмдәре туғандаш республикаға барып ҡайтты һәм бик ҡәнәғәт ҡалды. Уңайлы логистиканы тәьмин итеү өсөн төбәк Хөкүмәте субсидиялаған Өфө-Минск тура авиарейстарын астыҡ. Бынан тыш, быйыл йәй Илеш районындағы «Орленок» лагерында «Союзный» профилле лагеры эшләйәсәк, унда Беларусь балалары ял итәсәк. - Башҡортостан туристарҙы нимә менән йәлеп итә? - Башҡортостан – Рәсәйҙең, ә бәлки донъяның туристик сәфәрҙәр өсөн иң яҡшы төбәктәренең береһе. Беҙҙә инфраструктура, юлдар, юл яны сервисы яҡшы үҫешкән. Республикала 40-ҡа яҡын шифаханала һаулыҡты нығытырға мөмкин, шуларҙың унауһы илдә иң яҡшыһы тип танылған. Башҡортостан – шулай уҡ һоҡланғыс тәбиғәтле хәүефһеҙ биләмә, беҙ ҡунаҡсыллыҡ, экологик яҡтан таҙа туҡланыу һәм башҡалар менән йәлеп итәбеҙ. Әгәр Башҡортостанда бер тапҡыр булһағыҙ, мотлаҡ тағы килергә теләйәсәкһегеҙ. - Төбәктәр форумының эшлекле өлөшө ҡайҙа үтәсәк һәм Өфө ҡунаҡтарҙы нимә менән хайран ҡалдырасаҡ? - Форумдың эшлекле өлөшө «Торатау» конгресс-холында уҙа. Бында Рәсәй һәм Беларусь төбәктәре Х форумының төп эшлекле саралары, шул иҫәптән пленар ултырыш була. Салауат Юлаев майҙанында 350 квадрат метр майҙанда заманса милли тирмә ҡорасаҡбыҙ. Унда Валентина Матвиенко һәм Наталья Кочанова төбәктәрҙең дәүләт власы органдары етәкселәре менән осрашасаҡ. Ленин урамында Рәсәй һәм Беларусь төбәктәренең ижади делегациялары ҡатнашлығында «Дуҫлыҡ урамы» этник мәҙәниәттәр фестивале уҙғарыла. Форумдың тәүге көнөндә, 26 июндә, сара ҡунаҡтарын «Симфоник төн» көтә. Икенсе көндө «Ватан» паркында «Евразия йөрәгендә Славян баҙары» үтә. 28 июнгә ошо уҡ майҙансыҡта «Этно-төн» планлаштырылған. Рәсәй һәм Белорусь төбәктәренең Х форумында ҡатнашыусылар өсөн экскурсия программаһы, «Белорус кухняһы менән танышыу» гастрономик турҙары һәм Өфө буйлап экскурсия әҙерләнгән. Сығанаҡ һәм фото: pravitelstvorb.ru