Кичә, 13 майда, башкаланың Ленин урамында Уфа шәһәре мэры Ратмир Мәүлиев “Мәгариф аллеясы”н ачу тантанасында катнашты. Чара “Яшел Башкортстан” экологик акциясе кысаларында үткәрелде һәм “Педагог һәм остаз елы”на багышланды. Аллеяны утыртуда Уфа шәһәре хакимияте башлыгы Ратмир Мәүлиев, мәгариф һәм фән министрының беренче урынбасары Альберт Яримов, Уфа шәһәре хакимияте башлыгы урынбасары Гөлләрия Ялчикаева, Уфа шәһәре Ленин районы хакимияте башлыгы Олег Котов, укытучылар, ике тапкыр Советлар Союзы Герое Муса Гәрәев исемендәге башлангыч очу әзерлеге булган Уфа гомуми белем бирү мәктәп-интернаты курсантлары, педагогик хезмәт ветераннары, Башкортстан Республикасының мәгариф отличниклары һәм атказанган хезмәткәрләре катнашты. — Бу ел безнең өчен аеруча үзенчәлекле. Бүген Ленин урамындагы үзгәрешләр, һичшиксез, шәһәр мохитенең ничек үзгәрергә тиешлегенә үрнәк булып тора. Бүген безнең янәшәдә — безнең үсеп килүче буын, яшьләр хәрәкәте, алар да үз шәһәребезне ничек яратырга һәм аның матурлануы өчен нәрсә эшләргә кирәклеген күрә, — диде катнашучыларга сәламләү сүзендә Ратмир Мәүлиев. Чараның рәсми өлешеннән соң акциядә катнашучылар бергәләп алма агачлары утыртуга керештеләр. Шунысы мөһим, теләгән һәркем аллеяда утыртылган агачлар турында мәгълүматны исем такталары ярдәмендә белә ала. Аларда махсус QR-код сурәтләнгән, аны смартфон ярдәмендә сканерлап, агач утырткан оешма турында яки аның кем хөрмәтенә утыртылганын белергә мөмкин. Бу акциядә “Кызыл таң”ның якын дусты, Уфаның 4нче мәктәбенең укыту-тәрбия эшләре буенча директор урынбасары, Русиянең атказанган укытучысы Лилия Кәримова хөрмәтенә дә агач утыртылды. Алмагачтагы махсус QR-код аша укучыларга татар теле һәм әдәбиятыннан белем бирүче тәҗрибәле педагогның хезмәт юлындагы уңышлары белән танышырга мөмкин. Әлеге матур чарага Лилия Галинур кызы оныгы белән килгән иде. — “Педагог һәм остаз елы”нда укытучылар өчен бик күп әһәмиятле чаралар оештырыла. Бүгенге акциядә катнашуыма чиксез шатмын. Хәзер Уфабыз урамында оныгым белән бергәләп утырткан алмагач үсәчәк. “Мәгариф аллеясы” шәһәребезнең иң матур урыннарының берсе булачак, — ди остаз. “Яшел Башкортстан” акциясенең үзенчәлеге шунда ки, зур агачлар утыртудан тыш, янәшәдәге территория тулысынча төзекләндереләчәк, кечкенә архитектура формалары урнаштырылачак, чәчәк композицияләре утыртылачак. Исегезгә төшерәбез, “Яшел Башкортстан” акциясе кысаларында Уфада 3000нән артык агач һәм 2900 куак утыртылды.