Հայաստանում հասարակական, քաղաքական գործունեություն ծավալող շուրջ 13 անձի բջջային սարքերը վարակված են եղել «Pegasus» լրտեսական ծրագրով, նման եզրակացության է եկել թվային իրավունքների պաշտպանության Citizen Lab կանադական խումբը, որը հետազոտություն է իրականացրել իրավապաշտպան Access Now-ի, Amnesty International կազմակերպությունների և բջջային անվտանգության անկախ հետազոտող Ռուբեն Մուրադյանի հետ։
Հետազոտության շրջանակներում ստուգել են Հայաստանի մի շարք քաղաքացիների բջջային սարքերը, ինչի արդյունքում «Pegasus» լրտեսական ծրագրով վարակման դեպքեր են բացահայտվել։
Միջազգային հետազոտական խումբը նշել է, որ Pegasus լրտեսական ծրագրի թիրախում են հայտնվել ՀՀ ԱԳՆ նախկին խոսնակ Աննա Նաղդալյանը, Արցախի նախկին ՄԻՊ, իրավապաշտպան Ռուբեն Մելիքյանը, թյուրքագետ Վարուժան Գեղամյանը, ՀՀ նախկին ՄԻՊ Քրիստինե Գրիգորյանը, նախկին պատգամավոր, ՀՀԿ-ական Սամվել Ֆարմանյանը։ Թիրախավորված անձանց թվում են նաև լրագրողներ, մեդիայի աշխատողներ, 3 ակտիվիստ, քաղաքացիական հասարակության 4 ներկայացուցիչ, ՄԱԿ-ի ներկայացուցիչ։
Միջազգային հետազոտական խումբն ընդգծել է, որ չեն կարող վերը թվարկված վարակները միանշանակ վերագրել կոնկրետ պետական հիմնարկի կամ Pegasus-ի որևէ օպերատորի։ Խումբը, այդուհանդերձ, Ադրբեջանում գրանցված երկու օպերատոր է նույնականացրել, որոնց պայմանական անվանում է «BOZBASH» և «YANAR»: Խումբը կասկածելի է համարել հենց նշված երկու օպերատորներին, թեև այս տեսանկյունից ևս հստակ պնդումներ չկան։
Դեռ 2021-ի նոյեմբերին Apple-ը սկսել էր նախազգուշական նամակներ ուղարկել Pegasus-ի զոհերին: Բացահայտվել էր, որ Pegasus-ը «կոտրել է» որոշ երկրների պաշտոնյաների 50 000 բջջային հեռախոս։
2021-ի նոյեմբերին ԱԺ «Պատիվ ունեմ» խմբակցության նախկին ղեկավար, ԱԱԾ նախկին պետ Արթուր Վանեցյանն էր հայտարարել Pegasus ծրագրով գաղտնալսվելու մասին։