Բոլորս ուզում ենք հաղթահարել տնվորի մեր կարգավիճակը, ուզում ենք ունենալ կադաստրի վկայական, որի անունն է «պետություն՝ միջազգայնորեն ճանաչված դեմարկացված և դելիմիտացված սահմաններով»՝ ասաց ՀՀ վարչապետ Նիկոլ Փաշինյանը ԱԺ-Կառավարություն հարցուպատասխանի ժամանակ։
Նա սկանդալային հայտարարություն արեց, որ մենք մեր շատ սիրելի հայրենիքում 30 տարի ապրում ենք առանց կադաստրի վկայագրի:
«Եթե այն, ինչ ուզում ենք՝ ստացվի, առաջին անգամ պատմության մեջ կստանանք կադաստրի վկայական, սեփականատեր կլինենք ոչ միայն դե ֆակտո, այլ դե յուրե: Եթե դա ստացվի, Լեռնային Ղարաբաղի հայության անվտանգության և իրավունքների հարցով ինստիտուցիոնալ բանակցային պրոցես… այս պահին շանս ենք ստացել որ կարող ենք ստանալ ինչ-որ բան»,- պարզաբանեց նա:
Փաշինյանը նաեւ մեկնաբանեց Ալմա-Աթայի հռչակագիրը՝ ընդգծելով, որ դա ստորագրել է Լևոն Տեր-Պետրոսյանը:
«Հռչակագիրն ունի մեկ իմաստ՝ երկրներն ընդունում են, որ ադմինիստրատիվ սահմանները դառնում են պետական սահմաններ և այդ սահմանները անխախտելի են, սա Լևոն Տեր-Պետրոսյանն է ստորագրել»,- ասաց նա։
Փաշինյանը նաև տվեց Սերժ Սարգսյանի և Ռոբերտ Քոչարյանի անունները, որոնք, նրա հիշելով, այդ ժամանակ Գերագույն խորհրդի պատգամավոր են եղել:
Նշենք, որ 1992 թ․ ՀՀ Գերագուն խորհուրդը որոշում է կայացրել վավերացնել 1991 թվականի դեկտեմբերի 8-ին Մինսկում Բելառուսի Հանրապետության, Ռուսաստանի Ֆեդերացիայի և Ուկրաինայի կողմից ստորագրված Անկախ Պետությունների Համագործակցության ստեղծման մասին համաձայնագիրը, միայն թե վերապահումներով, որոնցում ընդգծվում է նաև ինքնորոշման իրավունքի սկզբունքին հավատարմությունը։ Այս որոշումը դրվել է Ալմա-Աթայի հռչակագրի հիմքում։ Նիկոլ Փաշինյանը, ամենայն հավանականությամբ, Գերագույն խորհրդի հենց այս որոշման մասին է խոսում՝ միայն թե լռելով վերապահումների մասին։