Башҡортостандың Йәмәғәт палатаһы республиканың "Йәмәғәт тормошо үҙәге" төбәк йәмәғәт ойошмаһы менән берлектә "Атай ҡаһарманлығы" йәмәғәт наградаһына конкурсҡа ғаризалар ҡабул итеүен дауам итә. Маҡсат - Башҡортостан атайҙарының ҡаҙаныштарын йәмәғәтселеккә танытыу, уларҙы дәртләндереү. Конкурста ҡатнашыуға Башҡортостанда даими рәүештә биш йылдан да кәм йәшәмәгән, Рәсәй гражданы булған һәм туғандары йәки уллыҡҡа (ҡыҙлыҡҡа) алынған (йәки опекаға һәм попечителлеккә алынған) балаларҙы тәрбиәләгән ир-егеттәр саҡырыла. Түбәндәге атайҙарҙың ғаризалары өҫтөнлөклө буласаҡ: - тыуған ҡала йәки район, республика тормошонда әүҙем ҡатнашҡан - йәмғиәттә әхлаҡи мөхитте яҡшыртҡан, ғаилә ҡиммәттәрен тергеҙгән, - сәләмәт йәшәү рәүеше алып барған, - күп шәхси ҡаҙаныштары булған, - балалары тормоштоң төрлө өлкәләрендә, мәҫәлән, спорт, уҡыу, фән, сәнғәт, производство һәм башҡа тармаҡтарҙа ҙур уңыштарға өлгәшкәндәрҙеке. Конкурста ҡатнашыусыларҙан положениела күрһәтелгән документтар пакетын әҙерләү һәм уны Башҡортостан Йәмәғәт палатаһының электрон почтаһына ебәреү талап ителә (oprb2011@mail.ru). Бүләкләү тураһында юлламаны атайҙар үҙҙәре генә түгел, шулай уҡ уларҙың балалары йәки хеҙмәттәштәре, урындағы үҙидара органдары, йәмәғәт ойошмалары ла эшләй ала. Мөрәжәғәттең урындағы йәмәғәт палатаһы/советы йәки республика власть органдары ҡарамағындағы йәмәғәт советы етәксеһе ҡултамғаһы менән бирелеүе мөһим. Ҡатнашыусыға йәки уның балаларына ҡарата ғәмәлдәге хөкөм ителеү ҡарары булыуы, кәрәкле документтар етмәүе ғаризаны ҡабул итеүҙән баш тартыу нигеҙе була ала. Бөтә ғаризаларҙы конкурс комиссияһы ҡараясаҡ. Ул наградлау материалдарын ҡарау һөҙөмтәләре буйынса ағымдағы йылдың 1 авгусына тиклем кандидатураларҙы Башҡортостан Йәмәғәт палатаһы Советына тикшереүгә тәҡдим итәсәк. Конкурс комиссияһы составына 12 кеше инә. Улар иҫәбендә - Башҡортостан Йәмәғәт палатаһы ағзалары, Атайҙар советы, ҡатын-ҡыҙҙар советы, "Торатау" конгресс-холы етәкселеге, Бала хоҡуҡтары буйынса вәкил. Бүләкләү тантанаһы Рәсәйҙә Атайҙар көнөн байрам итеүгә бәйле 4 октябрҙә "Торатау" конгресс-холында уҙасаҡ. Йола буйынса, атайҙар өсөн концерт программаһы һәм ҡотлауҙар әҙерләнә. Еңеүселәр йәмәғәт наградаһы - "Атай ҡаһарманлығы" билдәһе, еңеүсе дипломы менән бүләкләнә. Өҫтәмә мәғлүмәтте эш көндәрендә 280-82-36 телефоны буйынса иртәнге сәғәт 9-ҙан киске 6-ға тиклем алырға мөмкин (Башҡортостан Йәмәғәт палатаһы аппаратының ойоштороу тәьминәте бүлеге). Тейешле документтарҙы ошо һылтанма аша инеп табырға мөмкин: https://op.bashkortostan.ru/documents/other/481925/ Фото: api.rbsmi.ru