Կաշառք ստանալու մեղադրանքով ձերբակալվել են ԵՊՀ տնտեսագիտության և կառավարման ֆակուլտետի դեկանը, նրա տեղակալը, նույն ֆակուլտետի երկու դասախոս, ինչպես նաև վերջիններիս կաշառք տված անձինք: Տեղեկանում ենք Հակակոռուպցիոն կոմիտեի լրատվական ծառայությունից։
ԵՊՀ տնտեսագիտության և կառավարման ֆակուլտետի դեկան Հ. Սարգսյանը նույն ֆակուլտետի ամբիոնի դոցենտ Գ. Տ.-ի և այլ դասախոսների հետ համաձայնեցված 2023 թվականի փետրվարից մարտն ընկած ժամանակահատվածում ֆակուլտետի ուսանողից դրական գնահատական նշանակելու համար կաշառք են վերցրել։
Յուրաքանչյուր քննության համար ուսանողից վերցրել են 120 հազար դրամ, ընդհանուր՝ 480.000 ՀՀ դրամ կաշառք։
«Արդյունքում ուսանողն առանց անհրաժեշտ գիտելիքների ստուգման ստացել է դրական գնահատականներ»,–նշվումէ հաղորդագրության մեջ
Բացի այդ, դեկան Սահակյանն իր տեղակալ՝ նույն ֆակուլտետի ամբիոնի դոցենտ Ա. Ն.-ի հետ մեկ այլ ուսանողի օգտին թողտվություն, հովանավորչություն և ապօրինի գործողություն կատարելու դիմաց Պ. Հ.-ից ստացել են կոնյակ և 4000 ԱՄՆ դոլար կաշառք: Եվս երկու ուսանողից դեկան Սահակյանը և դոցենտ Գ.Տ–ն դրական գնահատական նշանակելու համար կաշառք են ստացել։
«Նախաքննությամբ պարզվել է նաև, որ Գ. Տ.-ն ֆակուլտետի մեկ այլ դասախոս Ա. Մ.-ի հետ վերջինիս մատնանշած ուսանողների օգտին 2023 թվականի մարտին նշանակված քննությունն առանց գիտելիքների իրական ստուգման դրական գնահատելու գործընթացը կազմակերպելու և իրականացնելու դիմաց ստացել են կաշառք»,–հավելում են հակակոռուպցիոն կոմիտեից:
Դեկանը, նրա տեղակալը, նույն ֆակուլտետի երկու դասախոսները և նրանց կաշառք տված ևս 5 անձ ձերբակալվել են: Նրանց մեղադրանք է ներկայացվել ՀՀ քրեական օրենսգրքի 435-րդ հոդվածի 2-րդ մասով (մի խումբ պաշտոնատար անձանց կողմից կաշառք ստանալը):
Միջնորդություններ են ներկայացվել դատարան՝ նրանց նկատմամբ կալանքը որպես խափանման միջոց ընտրելու համար: