Төп дәүләт имтиханын тапшырыу башланды Бөгөн Башҡортостанда Төп дәүләт имтиханын тапшырыуҙың төп осоро башланды. Республикала дөйөм белем биреү мәғариф программалары буйынса Дәүләт йомғаҡлау аттестацияһында ҡатнашыу өсөн 48 291 туғыҙынсы класс уҡыусыһы теркәлгән. 9-сы класты тамамлаусылар өсөн 405 имтихан үткәреү пункты әҙерләнгән. Быйыл 9-сы класс уҡыусылары өсөн имтихандар ғәҙәти формала уҙғарыла: аттестат алыу өсөн уҡыусыларға дүрт фән: рус теле, математика һәм һайлау буйынса ике фәндән имтихан тапшырырға кәрәк. Төп осор бөгөн, 24 майҙа, тарих, физика һәм биология буйынса имтихандарҙан башланды, уларҙа 11 907 туғыҙынсы класс уҡыусыһы ҡатнаша, уларҙың 3 991-е – физика, 6 998-е – биология, 918-е – тарих буйынса һынау тота. Имтихандар 110 пунктта ойошторола. Етди сәбәптәр буйынса төп имтихан көнөндә килә алмаған йәки кисерерлек сәбәптәр буйынса һынауҙы тапшыра алмаған сығарылыш уҡыусыларына, шулай уҡ бер йәки ике фәндән насар билдә алыусыларға 2023 йылдың 26 июненән 1 июленә тиклем резерв көндәрҙә имтихандарҙы ҡабаттан тапшырыу мөмкинлеге бирелә. Хәтерегеҙгә төшөрәбеҙ, Башҡортостанда Төп дәүләт имтиханы ике йыл рәттән айырым элемтә каналдары буйынса алынған имтихан материалдарын ҡулланып уҙғарыла: контроль-иҫәпләү материалдары (КИМ) имтихан тапшырған кешеләр алдында баҫыла, яуап бланктары һәм контроль-иҫәпләү приборҙары сканер аша үткәрелә һәм һаҡланған элемтә каналдары аша тапшырыла. Төп дәүләт имтиханы һөҙөмтәләрен сығарылыш уҡыусылары төрлө ысулдар менән – Дәүләт йомғаҡлау аттестацияһы һөҙөмтәләре менән танышыу сервисын файҙаланып, шулай уҡ мәктәптә еткереләсәк мәғлүмәттәр аша белә ала. Фото: egevpare.ru