Күршем Ләлә апайҙың ҡыяры йыл һайын емерелеп уңа. Бының сере бына нимәлә икән: "Иң мөһиме - орлоҡто сәсер алдынан дөрөҫ эшкәртергә һәм тупраҡ ҡатнашмаһын белеп һайларға кәрәк", - тине ул. Беҙҙең шарттарҙа күптәр йәшелсә үҫентеләрен башта – өйҙә, һуңынан теплицаға йәки асыҡ һауаға күсереп ултыртыу юлы менән үҫтерә, сөнки сағыштырмаса ҡырыҫ тәбиғәт шарттарында йәшәйбеҙ, төбәгебеҙҙә июнь башында ла ҡырау төшөү ихтималлығы ҙур. - Иң тәүҙә орлоҡтарҙы зарарһыҙландырыу сараһы үткәреү мотлаҡ. Иң һөҙөмтәле алым – калий перманганаты (марганцовка) иретмәһе. Бер литр һыуға 10 грамм марганцовка һалырға (ҡуйы шәмәхә төҫөндө булырға тейеш), унда орлоҡтарҙы 15-20 минут тотоп, һыу менән сайырға. Артабан 200 мл һыуға ике-өс тамсы “Гуми” кеүек биопрепарат өҫтәп, орлоҡтарығыҙҙы ошо ҡатнашмала бер нисә сәғәт тотоп алһағыҙ, улар “рәхмәт” кенә әйтер. Был сара орлоҡтарға көс бирә, - тине Ләлә апай. Ул шулай уҡ ҡыяр сәскән тупраҡҡа нимәләр ҡушыуы тураһында ла ентекле итеп аңлатты. - Ҡыяр үҫентеһе өсөн еңел тупраҡ (яҡынса 50%), йылға ҡомо (10-15%), торф (20-30%) һәм таҙа ағас онтағы (10-15%) алам. Уларҙы яҡшы итеп бутарға кәрәк. Орлоҡтарҙы мотлаҡ бүрттереп сәсәм. Йылы һыу ҡоям һәм шытымдар сыҡҡансы 22-25°С температура режимын һаҡларға тырышам. Шытымдар күренгәс, температураны 19-21°С арауығында тотам, - тип ҡыяр үҫтереү серҙәре менән бүлеште тәжрибәле баҡсасы. Фото: ok.ru