10 майҙа Башҡортостан Башлығы Радий Хәбиров уҙғарған аҙналыҡ оператив кәңәшмәлә 2023 йылдың ғинуар-мартында төбәктең ҡулланыусылар баҙары үҫешенә йомғаҡ яһалды. Республиканың сауҙа һәм хеҙмәттәр министры Алексей Гусев хәбәр итеүенсә, ҡулланыусылар хаҡтары индексы был осорға 101,2 процент тәшкил иткән. Рәсәй буйынса уртаса алғанда был түбәнерәк (101,7 процент). Шул уҡ ваҡытта ваҡлап сауҙа итеү күләме 276,3 млрд һумға еткән, был былтырғы ошо уҡ осор кимәленән 11,8 млрд һумға күберәк. – Быға хаҡтар торошон тотороҡландырыу буйынса эш булышлыҡ итте, – тип аңлатты Алексей Гусев. – Мәҫәлән, Башҡортостан Хөкүмәте башланғысы менән төбәк сауҙа селтәрҙәре 2023 йылда социаль әһәмиәтле аҙыҡ-түлек тауарҙарына өҫтәмәләрҙе сикләү тураһында меморандум төҙөнө. 2023 йылдың өс айы йомғаҡтары буйынса күмәртәләп сауҙа итеү әйләнеше 303,7 миллиард һумға еткән. Был 2022 йылдың беренсе кварталы кимәленән 14,3 процентҡа юғары. Ә көнкүреш хеҙмәттәре күләме 6,6 процентҡа – 10,5 миллиард һумға тиклем артҡан. Йәмәғәт туҡланыуы әйләнеше лә арта. Был күрһәткес 8,7 миллиард һум тәшкил итә – 2022 йылдың беренсе кварталына ҡарағанда 1,2 миллиард һумға күберәк. Министр тармаҡ инвестиция проекттарына айырым туҡталды. Башҡортостандың Сауҙа һәм хеҙмәттәр министрлығы йәмғеһе 118 эшҡыуарлыҡ башланғысы өсөн яуаплы. Инвестицияларҙың дөйөм күләме – 41,5 миллиард һум, шул иҫәптән юл буйы сервисы өлкәһендә 12 миллиард һумлыҡ 99 проект иҫәпләнә. – Республика һөт кухнялары селтәре лә яҡшы темптар менән үҫешә. Башҡортостанда ете производство һәм 131 аҙыҡ-түлек таратыу пункты эшләй, – тине Алексей Гусев. – Быйыл һөттө беренсел эшкәртеү цехын асыу күҙаллана, ул продукцияның үҙҡиммәтен кәметергә мөмкинлек бирәсәк. Бынан тыш, быйыл Октябрьскийҙа, Нефтекамала һәм Ҡыйғы районында производстволарҙы яңыртабыҙ. Һөт кухнялары продукцияһы менән бөтәһе 24,5 мең кеше – йөклө ҡатын-ҡыҙҙар һәм имеҙеүсе әсәләр, өс йәшкәсә балалар, шулай уҡ махсус хәрби операцияла ҡатнашыусыларҙың ғаилә ағзалары тәьмин ителгән. Башҡортостан Башлығы төбәктең Сауҙа һәм хеҙмәттәр министрлығы коллективына ҡулланыусылар баҙары эшенә булышлыҡ иткәне өсөн рәхмәт белдерҙе. – Сауҙа торошо – иҡтисад үҫешенең мөһим индикаторы. Был йәһәттән барыһы ла һәйбәт бара, – тип йомғаҡ яһаны Радий Хәбиров. – Һөт ризыҡтарының яңыртылған производствоһы ҡасан әҙер буласағын мотлаҡ хәбәр итегеҙ. Заманса эшкәртеү комплекстарының нисек эшләүен ҡараясаҡбыҙ. Фото: voshod.bashkortostan102.ru