Өфөлә вуз-ара студенттар кампусын төҙөү буйынса эш дауам итә. Проекттың тәүге этабын быйыл тамамлау ниәтләнә, икенсе сираты 2025 йылдың аҙағына тиклем тапшырыласаҡ. Кампус – Башҡортостандың фән, инновациялар һәм заманса белем биреү үҫешенең үҙәге. Ул үҙенә студенттарҙы һәм ғалимдарҙы ғына йәлеп итеп ҡалмаясаҡ, ҡалала йәшәүселәр өсөн дә заманса йәмғиәт киңлеге буласаҡ. Кампусты булдырыуҙың төп маҡсаты – иҡтисад секторына алдынғы техник ҡарарҙар индереү. Төҙөлөш эштәре “Фән һәм университеттар” милли проекттары сиктәрендә башҡарыла. Проектланған кампустың ер участкаһының майҙаны 4,85 гектар тәшкил итә. Фәнни белем биреү үҙәге Өфө ҡалаһының тарихи урынында урынлашсаҡ. Был объект эргәһендә Салауат Юлаевҡа һәйкәл, Конгресс-холл, Мәжит Ғафури исемендәге башҡорт дәүләт академия театры, “Динамо” стадионы була. Тәүге сиратта IQ-парк бинаһы төҙөлә. Уның майҙаны 35 868 квадрат метр тәшкил итә. Һәм ул ике өлөштән торасаҡ. Бинаның төп өлөшөн 7 ҡатлы комплекс биләйәсәк, унда эшлекле зоналар, стартап үҙәктәр һәм йәмәғәт киңлектәре урынлашасаҡ. Объекттың икенсе сиратын төп бина биләй. Уға майҙаны 78 мең квадрат метрҙан ашыу торлаҡ корпустары, бынан тыш уҡыу-аудитория блогы, лаборатория, социаль-көнкүреш киңлектәре һәм башҡа биналар инә. Кампустың маҡсаты – Башҡортостандағы университеттар өсөн яңы мөхит тыуҙырыу, донъя кимәлендәге университеттарға әүерелдереү. Был саралар “Өҫтөнлөк – 2030 “ программаһын тормошҡа ашырыу сиктәрендә башҡарыла. Фото: Башҡортостан Хөкүмәте сайты.