Бөгөн Хөкүмәттең Республикаға идара итеү үҙәгендә ойошторолған аҙналыҡ кәңәшмәһендә Башҡортостан Башлығы Радий Хәбиров республикала булдырылған бишенсе ирекле батальон тураһында һөйләне. Ул хәрби әҙерлек үтеү өсөн 12 майҙа юлға сығасаҡ. Яңы хәрби формирование легендар генерал Таһир Күсимов исемен йөрөтәсәк. Радий Хәбиров баш ҡалала батальонды оҙатыу ойошторорға ҡушты. Улар юлға йола буйынса Совет майҙанынан китәсәк. Башҡортостан Башлығы сираттағы “Атайсал” форумын Шүлгәнташ музейы майҙансығында үткәрергә ҡушты. – 4 майҙа беҙ “Яҡташлыҡ көсө” төбәк яҡташтар берлеге форумын үткәрҙек. Яҡшы сара, беҙгә ярҙам итеүсе республикабыҙҙан сыҡҡан билдәле яҡташтарыбыҙҙы йәлеп итәбеҙ. Аҡса тураһында шуны әйтә алам: беҙ башлағандан алып кешеләр йәнтөйәгенә миллиард ярым һум самаһы шәхси башланғыств тормошҡа ашырҙы. Ғаризалар һаны арта – минеңсә, проект уңышлы булды, – тине Радий Хәбиров. Башҡортостан Башлығы, киләһе яҡташтар форумын Шүлгәнташ музейы майҙансығында уҙғарыу тураһында ҡарар ҡабул ителде, тип хәбәр итте. Ул үҙенең хакимиәтенә Максим Забелин етәкселегендә әҙерлек эштәрен башларға ҡушты. Шулай уҡ ҡунаҡхана фондын булдырырға һәм яҡташтар килеүе, пленар ултырыш һәм тәжрибә уртаҡлашыу өсөн барлыҡ мөмкинлектәрҙе ҡарарға кәрәк тиелде. Радий Хәбиров шулай уҡ үҙенең Луганск Халыҡ Республикаһында булып, төбәк етәксеһе вазифаһын башҡарыусы Леонид Пасечник менән осрашып ҡайтыуы тураһында һөйләне. Ул Хөкүмәт Премьер-министры Андрей Назаровҡа был республика менән эш итеү буйынса юл картаһын тормошҡа ашыра башларға ҡушты. “Бөгөн-иртәгә йыйылырға кәрәк, дүрт яҡлы юл картаһына ҡул ҡуйылды, уларҙы тормошҡа ашыра башларға кәрәк”, – тине Радий Фәрит улы. Ул шулай уҡ был сәфәре тураһында ентеклерәк туҡтап һөйләне. Билдәле булыуынса, Радий Фәрит улы уҙған ялдарҙа Донбасс, Луганск Халыҡ Республикалары, Запорожье һәм Херсон өлкәләрендә булды. Ул республиканан мобилизацияланған егеттәр һәм Салауат Юлаев исемендәге батальон яугирҙәре менән осрашты. – Бөтә ерҙә лә тиерлек булдыҡ, 2,5 мең километр юл үттек. Ике батальонға инмәнек, әммә Днепрҙа алғы һыҙыҡта торған егеттәр янында булдыҡ. Унда, әйткәндәй, тулыһынса Бишбүләк районы кешеләренән торған взвод һуғыша. Уларҙың командиры ғына Өфөнән. Башҡалары – Бишбүләк, тине Радий Хәбиров. Башҡортостан Башлығы һүҙҙәренсә, беҙҙең егеттәр унда яҡшы урынлашҡан.. Улар дисциплиналы, яуаплы. Әлбиттә, уларға ярҙам кәрәк. – Әле ҡайһы бер әйберҙәрҙе унда алып барырға кәрәкмәй. Уның ҡарауы яңы һорауҙар барлыҡҡа килә. Мәҫәлән, полктарҙың береһендә блиндаждар эшләү, ябылыу өсөн ағас-таҡта һорайҙар ине. Хатта профилле тимер ҙә кәрәк, уны окоптар тирәләй ҡуйырға теләйҙәр. Был мәсьәләне өйрәнеүегеҙҙе һорайым, – тип ҡушты Радий Хәбиров. Бынан ары бөтә гуманитар ярҙам үҙәкләштерелгән булырға һәм республика Башлығы хакимиәте тарафынан координацияланырға тейеш, тип һыҙыҡ өҫтөнә алды. Фото: "Башинформ".