Көслө рухлы геройҙар ваҡыты етте

Бөгөн, 9 майҙа, Өфөләге “Башҡортостан” дәүләт концерт залында Бөйөк Ватан һуғышында Еңеүҙең 78 йыллығына арналған тантаналы йыйылыш үтте. Унда ветерандар, Рәсәй Геройҙары, махсус хәрби операцияла ҡатнашыусылар, уларҙың ғаилә ағзалары, Дәүләт Думаһы депутаттары һәм Хөкүмәт ағзалары, башҡа рәсми вәкилдәр йыйылды. – Бөгөн илебеҙ совет халҡының фашистик Германияны еңеүенең 78 йыллығын билдәләй. Ысын күңелдән һеҙҙе бөтә Рәсәй быуындарын берләштергән төп байрам менән ҡотлайым. Ул йылдарҙағы тарихи ҡаҙаныштар мәңгегә рәхмәтле хәтеребеҙҙә ҡаласаҡ. Беҙ һәр ваҡыт бөтә геройҙарҙы-фронтовиктарҙы һәм тыл хеҙмәтсәндәрен, уларҙың тиңһеҙ батырлығын исемләп иҫкә аласаҡбыҙ. 80 йыл элек, 1943 йылдың ғинуарында Ленинград блокадаһы өҙөлә. Нева ҡалаһы өсөн алыш Икенсе донъя һуғышының иң оҙайлы алышы була. Башҡортостан кешеләре лә фронттарҙа, Балтик флоты караптарында батырҙарса һуғыша, Нева тирәһендә һөжүмдәрҙе кире ҡаға, легендар “Йәшәү юлын“ һаҡлай. Быйыл шулай уҡ Сталинград алышының 80 йыллығы билдәләнә. Тап Волга ярҙарынан Ҡыҙыл Армияның еңеү маршы башлана, ул Гитлер Германияһын тар-мар итеү менән тамамлана. Башҡортостандан 75 меңдән ашыу яугир Сталинград алышында ҡатнаша. Һөжүм операцияһында 112-се Башҡорт кавалерия дивизияһы әүҙем удар көсө була. Сталинград янындағы алыштарҙа күрһәткән батырлығы өсөн ул Гвардия юғары исеменә лайыҡ була һәм Берлинға тиклем барып етә. Быйыл 23 февралдә дивизия командиры, Рәсәй Геройы, генерал-майор Миңлеғәле Шайморатовтың фажиғәле һәләк булыуына 80 йыл тулды. Генерал, Ватан өсөн һуғышта һәләк булған яугирҙар иҫтәлегенә Өфөләге Совет майҙанында монументаль комплекс астыҡ, – тине Радий Хәбиров. Башҡортостан Башлығы сығышында һуғыштан һуңғы йылдарҙа “ҡыҙыу нөктәләрҙә” һәм тыныслыҡ урынлаштырыу миссияларында тыныслыҡ һәм тәртип тәьмин итеү буйынса интернациональ бурысты үтәгәндә Еңеү һалдаттарының улдарының һәм ейәндәренең батырлығын билдәләне. Мәҫәлән, илдең яңы тарихында Рәсәй Геройы исеменә республиканан 30 кеше лайыҡ булған. - Фашизмды тар-мар иткәндән һуң 78 йыл үткәс, тағы ла көслө рухлы геройҙар ваҡыты етте, улар өсөн ҡәҙерле ветерандарыбыҙҙың сыҙамлығы һәм илһөйәрлеге иң лайыҡлы өлгө булып тора. Бөгөн илебеҙ ғәҙел донъя ҡоролошо өсөн көрәштә коллектив Көнбайышҡа ҡаршы тора, нацизмдың яңы тоҡомо менән көрәшә. Һәм беҙ, ата-бабаларыбыҙ кеүек, неонацизм менән көрәшәбеҙ, еңеүебеҙҙе яҡынайтыу өсөн барыһын да эшләйбеҙ. Яҡташтарыбыҙ фронтҡа киткән Өфөнөң Совет майҙанынан Шайморатов, Доставалов, Даян Мурзин, Салауат Юлаев исемендәге батальондар, “Ватан” отряды ирекмәндәрен оҙаттыҡ. Беҙҙең ирекмәндәр, меңәрләгән мобилизацияланған егеттәр, башҡа подразделениелар яугирҙәре кеүек үк, хәрби бурысын батырҙарса үтәй. Улар менән хаҡлы рәүештә ғорурланабыҙ”, — тип билдәләне Радий Хәбиров. Беҙҙең яугир-яҡташтарыбыҙ – ысын геройҙар. Уларҙың 500-ҙән ашыуы махсус хәрби операция башланғандан алып Батырлыҡ, Шайморатов, Салауат Юлаев ордендары, Суворов, Жуков миҙалдары менән бүләкләнгән. “Башҡортостандан алты кеше “Рәсәй Геройы” исеменә лайыҡ булды. Рәсәй Президенты ҡулынан Рәсәй Геройы йондоҙҙарын Октябрьскийҙан өлкән лейтенант Степан Белов һәм Бөрөнән гвардия майоры Борис Дудко алды. Был юғары исемгә Әбйәлил районында тыуып үҫкән прапорщик Тамерлан Илһамов, Яңауыл районынан өлкән лейтенант Игорь Насибуллин, Өфөнән өлкән лейтенант Максим Серафимов һәм Әлшәй районынан старшина Алмаз Сафин лайыҡ булды. Бөгөн беҙ, башыбыҙҙы түбән эйеп, Бөйөк Ватан һуғышы яландарында һәләк булған, яраларынан вафат булған, хәбәрһеҙ юғалған бөтә батырҙарҙы иҫкә алабыҙ. Төрлө йылдарҙағы хәрби хәрәкәттәрҙә антҡа тулыһынса тоғро ҡалғандарҙың барыһын да. Махсус хәрби операция барышында батырҙарса һәләк булғандарҙы. Уларҙың исемдәре мәңгегә беҙҙең йөрәктәрҙә ҡаласаҡ, – тип Радий Хәбиров һәләк булған батырҙар иҫтәлегенә бер минут тынлыҡ иғлан итте. Башҡортостан Башлығы махсус хәрби операцияла һәм уларҙың ғаиләләре хаҡында хәстәрлек күреүҙе мөһим бурыс тип атаны. Уҙған йылдан республика, Хөкүмәте федераль ярҙам сараларына өҫтәп, 33 ярҙам сараһын индерҙе, тип билдәләне Радий Хәбиров. Махсус хәрби операцияһында ҡатнашыусыларға ярҙам итеү республика үҙәге эшләй башланы. Бындай үҙәктәр Стәрлетамаҡта, Сибайҙа, Нефтекамала барлыҡҡа килде. Тиҙҙән уны Өфөлә асасаҡбыҙ. Хәрбиҙәр, уларҙың туғандары һәм яҡындары “берҙәм тәҙрә” режимында һәр яҡлап ярҙам ала, – тине Радий Хәбиров. Ул шулай уҡ ул Еңеү көнө алдынан яугир яҡташтарыбыҙ эргәһенә барып ҡайтыуы тураһында ла әйтеп үтте, ҡайнар сәләмдәрен еткерҙе. Республика Башлығы махсус хәрби операцияла ҡатнашыусыларға һәм көс структуралары вәкилдәренә генерал Шайморатов ордендарын һәм миҙалдарын тапшырҙы. Генерал Шайморатов орденына Бөйөк Ватан һуғышы ветераны Иван Гаврилович Ефременко ла лайыҡ булды, уға быйыл 8 мартта 100 йәш тулды. Бүләкте уның ейәне ҡабул итте. Фото: Олег Яровиков.