Քանի որ Տեղ գյուղի հատվածում ամեն օր բախումներ են լինում, այս պահի դրությամբ չենք կարող ինժեներական աշխատանք կատարել։ Այս մասին Եռաբլուրում մայիսի 8-ին ասաց Սյունիքի նախկին մարզպետ Մելիքսեթ Պողոսյանը լրագրողների հետ զրույցում։ Նրա խոսքով՝ աշխարհազորը Տեղ գյուղից մինչև Խոզնավար 26 մարտական դիրք է պահում։
«Զինված ուժերի պահպանությունը խտացրել ենք, որպեսզի այսօրվա դրությամբ ԶՈւ-ն կարողանա իր առաքելությունը կատարել»,- ասաց նա։ Հարցին, թե կա՞ն արդյոք անվտանգային երաշխիքներ, Պողոսյանն ասաց, որ միասնական պայքարի դեպքում այդպիսի երաշխիքներ կլինեն։ «Ազգը պիտի բանակ դառնա, միասնական պիտի այս ճահիճից դուրս գանք, ժողովուրդ»,- ասաց նախկին մարզպետը։
Հիշեցնենք, որ ապրիլի 11-ին՝ ժամը 16:00-ի սահմաններում, Ադրբեջանի ԶՈւ ստորաբաժանումները կրակ են բացել Տեղ համայնքի հատվածում ինժեներական աշխատանքներ իրականացնող ՀՀ ԶՈւ զինծառայողների ուղղությամբ: Հայկական կողմը դիմել է պատասխան գործողությունների: Ադրբեջանական սադրանքի հետևանքով հայկական կողմն ունի 4 զոհ և 6 վիրավոր։ ՀՀ ԱԳՆ-ն Բաքվի սադրանքը Հայաստանի տարածքային ամբողջականության դեմ ոտնձգություն է որակել։ ՀՀ ՊՆ-ն տեղեկացրել է ապրիլի 11-ի փոխհրաձգության հետևանքով դիրքային կորուստներ չունենալու մասին։
Հիշեցնենք նաև, որ օրերս ԱԺ-ում Փաշինյանը հայտարարել էր, որ ՀՀ-ն լիարժեքորեն ճանաչել է Ադրբեջանի տարածքային ամբողջականությունը։ Նա հայտնել էր, որ Մադրիդյան սկզբունքներով Արցախը ճանաչվել է Ադրբեջանի կազմում։ Երեկ ՀՀ նախկին ԱԳ նախարար Վարդան Օսկանյանն անդրադարձել էր Փաշինյանի պնդումներին։ Արցախի ԱԺ-ն անընդունելի էր համարել ՀՀ վարչապետի՝ Արցախի կարգավիճակն անտեսելու վերաբերյալ հայտարարությունը։
Հավելենք, որ ՀԱՊԿ քարտուղարության ներկայացուցիչ Յուրի Շուվալովը հայտարարել է, որ Հավաքական անվտանգության պայմանագրի կազմակերպությունը մշտական պատրաստակամության մեջ է առաքելություն ուղարկել հայ-ադրբեջանական սահման։ Մինչ այդ բազմիցս խոսվել է նաև Հանրապետությանը ռազմատեխնիկական աջակցություն ցուցաբերելու պատրաստակամության մասին։ ՀՀ ԱԳ նախարար Արարատ Միրզոյանը մարտի 20-ին Մոսկվայում ռուս գործընկերոջ հետ համատեղ մամուլի ասուլիսի ժամանակ նշել էր, որ ՀԱՊԿ առաքելություն ուղարկելու որոշման նախագիծը սեղանին է, նախագծի վրա աշխատանքները շարունակվում են: Միևնույն ժամանակ նա նշել էր, որ Երևանը գործընկերներից ակնկալում է քաղաքական գնահատական՝ կապված Ադրբեջանի սեպտեմբերյան ագրեսիայի հետ:
Armenia Today-ը «Ինչպիսին է կյանքը Տեղում՝ Ադրբեջանի ապրիլյան սադրանքից հետո» տեսանյութում ներկայացնում է Տեեղ գյուղում տիրող իրավիճակն ու տրամադրությունները ապրիլի 29-ի դրությաամբ։