Бер авылда ике һәйкәл ачылды

“Барлык буын чик сакчыларына” һәйкәле былтыр ук әзер иде, ләкин аны ачу тантанасын бераз кичектереп торырга карар иттеләр. Җиңү паркында моннан 30 еллап элек Бөек Ватан сугышында катнашучылар хөрмәтенә куелган һәйкәлне дә яңартырга һәм төзекләндерергә булдылар.Башланган эш – беткән эш, диләр. Авылның активистлары, район һәм Карлыман авыл биләмәсе хакимиятләре, шушы авылда туып-үскән чик сакчылары һәм туган авылының тарихына хөрмәт белән караучы, киләчәген кайгыртып яшәүче барлык изге күңелле кешеләр, биредә эшчәнлек алып баручы оешмалар, шул исәптән “Уралхим” җәмгыяте ярдәме белән бүген Урал авылының Җиңү паркы күркәм төс алды.Һәйкәлләрне ачу тантанасы уңаеннан бирегә күпсанлы мәртәбәле кунаклар, районнның хәрби хәрәкәтләр ветераннары, запастагы чик сакчылары оешмасы әгъзалары, Урал һәм якын-тирәдәге авыллар халкы килде. Җыелучылар төрле чорлардагы сугышларда һәлак булган якташларын бер минут тынлык белән искә алды һәм һәйкәлләргә чәчәкләр салды. Авылның активисты Венер Әлимгафаров Җиңү паркына нигез салган мәлләрне, Бөек Ватан сугышында катнашкан якташлар хөрмәтенә һәйкәл ачуга күп көч салучыларны исемләп телгә алды. Ә инде “Төрле буын чик сакчыларына” һәйкәленең үз тарихы бар. Хәрби хезмәте чик сагы гаскәрләрендә узган Венер Җәвит улының юбилеена улы чик баганасы бүләк итә. Аны кайда урташтырырга дигән уйны ул хезмәттәшләренә – чик сакчыларына җиткерә. Шулай, бергәләп һәйкәл ачарга дигән карарга киләләр. Моны авылның чик сагы ветераннары үз көчләре белән башкарып чыга. Шул вакытта Бөек Ватан сугышында катнашкан якташларына куелган һәйкәлне дә яңартырга булалар. Аларның изге ниятен авыл халкы да, район һәм авыл биләмәсе хакимиятләре дә хуплап ала һәм барлык яклап ярдәм күрсәтә.Бердәм эшнең нәтиҗәсе күз алдында. Чыгыш ясаучылар билгеләвенчә, бүгенге көндә мондый һәйкәлләрнең барлыкка килүе аеруча зур әһәмияткә ия. Ул, бер яклап, тарихыбызга, үткәннәребезгә тирән хөрмәт билгесе булса, яшь буынны патриотик рухта тәрбияләү буенча да зур роль уйный. Шулай ук күптән түгел биредә авыл халкы башлангычы белән махсус хәрби операция барышында һәлак булган Максим Багавеевка истәлекле мемориаль тактаташ куелды һәм парк биләмәсендә якташыбыз истәлегенә агач утыртылды.Район хакимияте башлыгы Әлфир Сабиров та үзенең чыгышында изге эштә актив катнашучыларга зур рәхмәтләрен белдерде. Шулай ук Әлфир Фәрхәт улы районыбызда Рөстәм Маннанов җитәкчелегендәге Чик сакчылары хәрәкәтенең бик көчле булуын, аларның районыбызның тормышында актив катнашуын, яшьләрне патриотик рухта тәрбияләү буенча зур өлеш кертүләрен билгеләп узды.Монументны төзүдә, Җиңү паркын төзекләндерүдә һәм әлеге тантаналы чараны үткәрүдә актив катнашучыларның барысы да район һәм Карлыман авыл биләмәсе хакимиятләре, шулай ук Чик сакчылары ветераннарын һәм запастагы хәрби хезмәткәрләрен берләштерүче “Граница” төбәк иҗтимагый оешмасының Рәхмәт хатлары белән билгеләнделәр.Тантаналы митингтан соң кунаклар якындагы мәйданчыкка юнәлде. Биредә “Яшьлек” үзәге балалар өчен төрле спорт уеннары, ярышлар оештырды. Теләге булганнар район Мәдәният сарае артистлары һәм үзешчәннәренең Бөек Җиңүнең 78 еллыгына багышланган концертын тамаша кылды. Ә аннары иде авыл халкы һәм кунаклар сый-нигъмәтләр белән тулы табын артына җыелышып, үзләре әзерләгән тәм-томнар, кайнар чәй һәм казаннарда пешкән пылау белән сыйланды.Очрашу-аралашу шатлыгы да бүләк итте әлеге чара. Күптән күрешмәгән дус-туганнар шатлыклары, уңышлары белән уртаклашты, шундый зур эш башкаруда алдан йөрүчеләргә чиксез рәхмәтләрен җиткерде.Авыл кечкенә булса да, бәйрәмне бик олылап үткәрделәр биредә. Җыелучылар санына карап та, авылда һәйкәлләр ачу, бердәм эшнең нәтиҗәсен билгеләүнең нинди зур әһәмияткә ия булуын аңларга, халыкның бердәм, тату булуын тоярга мөмкин иде.Эльвира Ямалетдинова фотолары.