БСТ телеканалы Ватанны яклаучылар турында яңа документаль фильмнар күрсәтәчәк

9 майда республиканың баш телеканалы "Геройлар" циклыннан яңа фильмнар тәкъдим итәчәк. Аларның берсе - Тамерлан Илһамов турында. Башкортстанның гвардия прапорщигы Тамерлан Илһамовка "Русия Герое" исеме үлгәннән соң бирелде. Ул 2022 елның 4 июлендә Украинадагы СВО барышында хәрби бурычын үтәгәндә һәлак булды. Билгеле булганча, ул бүлекчәнең барлык шәхси составының үлеменә юл куймаган. Тамерлан һөнәре буенча юрист булган, хәрби хезмәттән соң контрактка кул куйган. Батыр турында тулырак 9 майда 17.45 сәгатьтә карый аласыз.Циклдан тагын бер фильм - "Ротный Насыйбуллин" дип атала. Премьера 8 майда, 17.45тә узачак. Танк ротасы командиры Игорь Насыйбуллин хәрби бурычны үтәгәндә күрсәткән батырлыклары өчен "Русия Федерациясе Герое" исеменә тәкъдим ителә (һәлак була). Игорь - хәрбиләр династиясе вәкиле. Насыйбуллиннар династиясендә күпчелек ир-енетләр хәрби хезмәтне сайлаган. "Шундый һөнәр бар - Ватанны яклау" - Насыйбуллиннар өчен изге сүзләр. Аны шаян һәм үҗәт егет итеп искә алалар. Ул удмурт телен һәм гореф-гадәтләрен яраткан. Хәзер Яңавыл районының Иске Вәрәш авылы укучылары Игорь Насыйбуллинны “безнең патриот” дип атый.БСТ телеканалы "Кире кайтарылган исемнәр" циклы өстендә дә эшен дәвам итә. Чираттагы фильм - Бөек Ватан сугышы ветераны Дәүләт Якупов турында. Башкорт әдәбияты дәреслекләрендә "Дон далаларында" бәете очрый. Бу әсәрдәге вакыйгалар кызылармеец Якупов исеменнән бәян ителә. Кызылармеец Дәүләт Якупов турында фактлар очраклы рәвештә генә ачыклана, ул Мәчетле районының Яңа Мәҗлес авылында туган, өстәвенә, талантлы шагыйрь булган. Гвардия өлкән сержанты Дәүләт Якупов 112нче Башкорт кавалерия дивизиясендә танкка каршы бүлекләр командиры булып хезмәт итә. Польша, Украина торак пунктлары өчен сугышларда кылган батырлыклары өчен III дәрәҗә Дан ордены, "Сугышчан хезмәтләре өчен" медале, Кызыл Йолдыз ордены белән бүләкләнә. Дәүләт Якупов Берлиндагы Җиңү көне алдыннан һәлак булган. 7 майда - 22.45, 8 майда - 10.00 һәм 9 майда 23.00 сәгатьтә БСТ телеканалында "Кызылармеец Якупов" документаль драмасын карагыз.Исегезгә төшерәбез, 9 майда БСТда Җиңү көненә багышланган телемарафон узачак. Ул 9:00 сәгатьтә башлана. Туры эфирда БСТ журналистлары илнең төп бәйрәменең иң якты чаралары турында сөйләячәк, республика районнары һәм шәһәрләре белән туры элемтәләрне оештырачак, Бөек Ватан сугышы ветераннары турында видеосюжетлар, документаль фильмнар күрсәтәчәкләр. Тамашачыларны канал журналистлары әзерләгән эксклюзив материаллар да көтә. Моннан тыш, БСТ Уфа шәһәренең Октябрь проспекты буенча хәрби хезмәткәрләрнең 12:00 сәгатьтә тантаналы узуын, Совет мәйданында 19:00дән патриотик концертны һәм 23:00 фейерверкны да күрсәтәчәк.