Ҡыҙылса сирен балалар инфекцияһы тип йөрөтһәләр ҙә, уның менән төрлө йәштәге кешеләрҙең ауырыуы ихтимал. Өҫтәүенә был сирҙе ололар ауырыраҡ үткәреүсән. Ҡыҙылса – киҫкен йоғошло ауырыу, бик тиҙ таралыусан, йоғошлолоҡ 100 процентҡа яҡын. Ул һауа-тамсы юлы менән тарала. Инфекция сығанағы – ҡыҙылса менән сирле кеше. Сир өс этапта үтә. Тәүгеһе кинәт башлана, дөйөм хәлһеҙлек, температураның 40 градусҡа тиклем күтәрелеүе, баш ауыртыуы, тымау, ҡоро йүтәл йонсотоуы күҙәтелә. Һуңғараҡ күҙҙең яҡтылыҡтан ауыртыуы, конъюнктивит башланыуы, күҙ ҡабаҡтарының шешенеүе һиҙелә. Яңаҡтарҙа ҡаймалы аҡ таптар барлыҡҡа килә. Икенсе осор сабыртмалар сығыуы менән характерлана. Таптар бик тиҙ арта, уларҙың бергә ҡушылыу үҙенсәлеге бар. Тәүҙә улар ҡолаҡ артында, баштың сәсле өлөшөндә күренә, аҙаҡ битте, муйынды һәм күкрәкте баҫып ала. Аҡрынлап сабыртма бөтә кәүҙәне өҫтән аҫҡа тиклем ҡаплай. Ауырыу сабыртма күренеүҙән өс-дүрт көн алда һәм сабыртма сыҡҡандан һуң тәүге дүрт көндә йоғошло һанала. Өс-дүрт көндән һуң өсөнсө осор – пигментация осоро башлана. Был мәлдә ауырыуҙың хәл торошо яҡшыра башлай. Ҡыҙылсаның пневмония, энцефалит, менингит, полиневрит, отит кеүек өҙлөгөүҙәргә килтереүе ихтимал. Баш мейеһе шешенеүенә килтереүсе ҡыҙылса энцефалиты һәр 1000 осраҡтың береһендә үҫешә. Сирҙе иҫкәртеүҙең иң тәьҫирле сараһы – вакцинация. Уны планлы тәртиптә иҫкәртеү прививкаларының Милли календарына ярашлы бөтә халыҡҡа 35 йәшкә тиклем һәм айырым хәүеф төркөмөнә ҡараған өлкәндәр араһында 36 йәштән 55 йәшкә тиклем яһайҙар. Балаларға прививка бер йәштән алты йәшкә тиклем яһала. Әгәр вакцинация ваҡытында яһалмаһа йәки ҡыҙылсаға ҡаршы прививка эшләнеүе тураһында мәғлүмәт булмаһа, вакцинацияны өлкәндәргә өс ай ара менән ике этапта үткәрәләр. Ике тапҡыр яһағандан һуң осраҡтарҙың 95 процентында иммунитет формалаша. Ғаиләлә берәйһе сирҙе эләктерһә, уның менән бәйләнештәге башҡа кешеләр ҙә медицина күҙәтеүенә алына. Кемдер элек прививкаланмаған, ҡыҙылса менән сирләмәгән йәки бер тапҡыр ғына вакцина яһатҡан һәм сирле кеше менән бәйләнештә булған икән, ауырыу асыҡланғандан алып тәүге 72 сәғәт эсендә эпидемик күрһәткестәр буйынса экстрен иммунизация үткәрелә. Фото:Һаулыҡ һаҡлау министрлығы