Инвестиция проекты иген һаҡлау ҡеүәтен арттырырға ярҙам итәсәк

Башҡортостан Хөкүмәте хәбәр итеүенсә, “АМКОДОР” Беларусь холдингы Башҡортостан Республикаһында иген эшкәртеү өсөн ауыл хужалығы ҡорамалдары етештереү буйынса завод төҙөү буйынса инвестиция проектын тормошҡа ашырыуҙы дауам итә. Проект бер йыл элек республика Башлығы Радий Хәбиров үткәргән “Инвестиция сәғәте” ултырышында ҡаралды, ул республика биләмәһендәге өҫтөнлөклөләр исемлегенә индерелде. Завод төҙөлөшө “Өфө” индустриаль паркы биләмәһендә бара, бөгөн бында төҙөлөш-монтаж эштәре тамамлана. Төҙөүселәр производство һәм административ-көнкүреш корпустары, һалҡын келәт төҙөй һәм биләмәләрҙе төҙөкләндерә. – Былтыр игендең рекордлы уңышы һәм игенгә хаҡтарҙың түбән булыуы беҙгә һаҡлау өсөн өҫтәмә ҡеүәттәр төҙөүгә этәргес бирҙе. 2022 йылда ғына уларҙы 10 процентҡа, кәмендә 4,3–4,4 миллион тоннаға тиклем арттырырға планлаштырабыҙ. Тиҙҙән Өфө эргәһендә эшләй башлаясаҡ “Амкодор-Ағиҙел” заводы был эште һиҙелерлек еңеләйтәсәк, – тип хәбәр итте төбәк Хөкүмәте Премьер-министры урынбаҫары – ауыл хужалығы министры Илшат Фәзрахманов. Иҫегеҙгә төшөрәбеҙ, проектҡа һалынған аҡса күләме 1,05 миллиард һумға баһалана. Ул 250-гә яҡын яңы эш урыны булдырырға мөмкинлек бирәсәк. Белешмә: 2023 йылдың 26–28 июнендә Өфөлә Рәсәй һәм Беларусь Республикаһының X Юбилей Форумы үтәсәк. Йыл һайын үткәрелә торған сара 2014 йылдан Рәсәй Федерацияһы Федераль Йыйылышының Федерация Советы Һәм Беларусь Республикаһы Милли Йыйылышының Республика Советы патронаты аҫтында үткәрелә. Форумдың төп бурыстары – Союздаш дәүләттең интеграция процестарын тәрәнәйтеү, Беларусь Республикаһы менән Рәсәй Федерацияһының парламент-ара, сауҙа-иҡтисади, фәнни-мәғариф, мәҙәни бәйләнештәрен нығытыу, эшлекле бәйләнештәрҙе киңәйтеү, ике яҡлы хеҙмәттәшлектең перспективалы йүнәлештәрен үҫтереү. Форум барышында шулай уҡ ике илдең 10 йыллыҡ хеҙмәттәшлеген берләштерәсәк “Рәсәй һәм Беларусь төбәктәре Форумы тарихы” күргәҙмәһен ойоштороу планлаштырыла. Фото һәм мәғлүмәт сығанағы: pravitelstvorb.ru