Ауылда ла һуғыш башланыуы тураһында хәбәр таралғайны, бөтәһе лә илашалар...

“Башҡортостан” гәзите коллективы йыл һайын Бөйөк Еңеү байрамы алдынан гәзиттең иҫән ҡалған берҙән-бер тыл ветераны Ғәптиә Нурғәлинаны ҡотларға бара. Быйыл да изге йолаға тоғро ҡалып, “Башҡортостан” гәзитенең баш мөхәррире, Башҡортостан Журналистар союзы рәйесе Вәдүт Исхаҡов етәкселегендәге делегация ветеранды тәбрикләне. Ғәптиә Ғәбиҙулла ҡыҙы беҙҙе һәр йылдағыса ихлас ҡаршы алды. Ул, 97 йәштә булһа ла, бик теремек, хәтере яҡшы, шуға ла уның менән сәғәттәр дауамында һөйләшеп ултырырға мөмкин. Был юлы ла Ғәптиә апай һуғыш йылдары тураһындағы хәтирәләре менән уртаҡлашты. Шулай уҡ ул беҙ килеүгә "Башҡортостан" гәзитендә эшләгән йылдарындағы фотоларҙы ла әҙерләп ҡуйғайны. – 1941 йылда етенсе класты тамамланым. Беҙҙе Өфөгә экскурсияға ебәрҙеләр. Таң менән ҡалаға килеп төштөк. Беҙҙең ауылдан уҡыған аспирант Хәлил Зәйнуллин ҡаршы алды, Пушкин урамындағы йортҡа әйберҙәрҙе ҡалдырҙыҡ. Ленин, Сталин баҡсаһын ҡараныҡ. Урамдарҙы ҡарап йөрөгәндә, Хәлил ағай йүгереп килде һәм һуғыш башланыуы тураһында хәбәр итте. Өфөнө ҡарап та өлгөрмәнек, беҙгә кискә кире ҡайтырға тура килде. Ауылда ла һуғыш башланыуы тураһында хәбәр таралғайны, бөтәһе лә илашалар. Бөтә халыҡ Еңеү хаҡына тырышып, бер-береһенә ярҙамлашып, татыу йәшәне һәм эшләне, – ти ветеран. Ғәптиә Ғәбиҙулла ҡыҙы Нурғәлина 1925 йылдың 25 октябрендә Ауырғазы районының Мос­тафа ауылында тыуған. 1937 йылда уларҙың ғаиләһе Ғафури районының Яңы Бурлы ауылына күсә. Ҡыҙ Иҫке Бурлы ауылында урта мәктәпте тамамлағас, 1944 йылда ошо ауылда уҡыта башлай. Һуғыштан һуң Стәрлетамаҡ дәүләт педагогия институтын тамамлай. Йәш белгес Әбйәлил районының Ташбулат, Балапан ауылдарында һәм Баймаҡта уҡытыусы булып эшләй. Унда ул тормош иптәше Зиннур Әхмәҙи улы Нурғәлинде осрата. 1959 йылда Зиннур Нурғәлинде Өфөгә “Совет Башҡортостаны” гәзитенә хәбәрсе итеп эшкә саҡыралар, һөҙөмтәлә ғаилә баш ҡалала төпләнә. Ғәптиә Нурғәлина 1964 йылдан 1980 йылға тиклем “Совет Башҡортостаны” гәзитендә эшләп, хаҡлы ялға сыға. Беҙ Ғәптиә Ғәбиҙулла ҡыҙын, шулай уҡ барлыҡ һуғыш һәм тыл ветерандарын Бөйөк Еңеү көнө менән ихлас күңелдән ҡотлайбыҙ! Хөрмәтле ветерандар, һеҙҙең Ватан именлеге һәм беҙҙең яҡты киләсәк хаҡына күрһәткән батырлыҡтарығыҙ, фиҙакәр хеҙмәтеҙ өсөн оло рәхмәт белдерәбеҙ! Айрат Нурмөхәмәтов фотоһы.