Ирина Абрамова: “Беҙҙең бурыс – эшҡыуарға дөрөҫ юл күрһәтеү”

Башҡортостан Республикаһы Фәндәр академияһының Стратегик тикшеренеүҙәр институты директоры Владимир Савичев Башҡортостандың Евразия халыҡтары Йыйылышы вәкиллегенең «Намыҫлы диалог» мәғлүмәт проектында модератор сифатында ҡатнашты. Был осрашыуҙа төп сығыш яһаусы булып Эшҡыуарҙар хоҡуҡтарын яҡлау буйынса вәкил Ирина Абрамова билдәләнде. Эшҡыуарҙар һәм эксперттар республикала кесе һәм урта эшҡыуарлыҡ өлкәһендә хоҡуҡтарҙы яҡлау буйынса эшмәкәрлек тураһында һөйләне. Башҡортостан - эшҡыуарҙар хоҡуҡтарын яҡлау буйынса вәкил вазифаһы индерелгән беренсе Рәсәй төбәге. Был органды асыу өсөн республика законы ҡабул ителә һәм эшҡыуарлыҡ субъекттарының хоҡуҡтарын һәм законлы мәнфәғәттәрен яҡлауҙың һөҙөмтәле системаһы төҙөлә. Әлеге институт эшмәкәрлегенең бер тиҫтә йыл дәүерендә ҙур тәжрибә туплана, меңәрләгән эшҡыуар үҙҙәренең хоҡуҡтарын яҡлауға өлгәшә. Сарала ҡатнашыусылар Ирина Евгеньевна Абрамоваға һорауҙар бирҙе, киҫкен мәсьәләләр буйынса фекер алышты, кәңәш алыу мөмкинлегенә эйә булды. - Ошо йылдар дәүерендә эшҡыуарҙар хоҡуҡтарын яҡлау буйынса вәкилдең эшмәкәрлеге яйға һалынған һәм һөҙөмтәле эшләй. Был тәү сиратта аҙна һайын үткәрелгән осрашыуҙарға бәйле. Унан килә беҙ мөрәжәғәт менән килгән бер кешенең генә мәсьәләһен хәл итмәйбеҙ. Уның мөрәжәғәтенә нигеҙләнеп, анализ яһап, был ҡыйынлыҡ менән башҡа эшҡыуарҙар осрашамы-юҡмы икәнен ҡарап, проблеманы системалы хәл итәбеҙ. Тәү сиратта эшҡыуарҙар ер, уны законлаштырыу, хоҡуҡ һаҡлау органдары менән эш итеү, ҡаты көнкүреш ҡалдыҡтары менән эш итеү мәсьәләләре менән мөрәжәғәт итә. Былтыр йәмғеһе 455 мөрәжәғәт ҡабул ителгән. Үткән йыл эшҡыуарҙар өсөн ҡатмарлы булды: санкциялар сиктәрендә эш итергә тура килде, ил сәйәсәтендәге үҙгәрештәр һәм башҡаһы йоғонто яһаны. Әммә ошо ауырлыҡтар мәлендә үткәрелгән һорау алыу ҡыуандырҙы – эшҡыуарҙарҙың күбеһе Башҡортостан бизнес алып барыу өсөн иң тотороҡло төбәк тип билдәләнде. Был - һәйбәт күрһәткес. Беҙҙең бурыс – эшҡыуарға дөрөҫ юл күрһәтеү. Күпселек осраҡта закондарҙы белеп бөтмәү арҡаһында бөтөн ауырлыҡтар килеп сыға, - тип аңлатма бирҙе Ирина Абрамова. Фото Башҡортостанда эшҡыуарҙар хоҡуҡтарын яҡлау буйынса вәкиленең матбуғат хеҙмәтенән алынды.