Өфөгә Фёдор Емельяненко килде

Башҡортостанға Рәсәйҙең Ҡушма алыш төрҙәре союзы президенты, Рәсәйҙең спорт министры кәңәшсеһе, ҡушма алыш төрҙәре буйынса күп тапҡыр донъя чемпионы Фёдор Емельяненко килде. Ул Рәсәйҙең ҡушма алыш төрҙәре (ММА) буйынса 18-20 йәшлек егеттәр араһындағы беренселекте һәм 18-20 йәшлек ҡыҙҙар араһындағы Бөтә Рәсәй рәсми булмаған ярыштарҙың асыҡ тантанаһын асыуҙа ҡатнашасаҡ. Турнир Бөйөк Ватан һуғышында Еңеүгә 78 йыл тулыуға арнала. Өфөләге “Телеүҙәк” бинаһындағы “Рәсәй” медиаүҙәгендә ошо сараға арналған матбуғат конференцияһы булды. Унда Рәсәйҙең Ҡушма алыш төрҙәре союзы президенты Фёдор Емельяненко, республиканың спорт министры урынбаҫары Артем Новиков, Башҡортостандың Ҡушма алыш төрҙәре буйынса федерация президенты Руслан Зарипов журналистарҙың һорауҙарына яуап бирҙе. Был спорт сараһында еңеп сыҡҡандар милли командалар составына инәсәк һәм быйыл дуҫ илдәр араһында ойошторолған халыҡ-ара ярыштарҙа ҡатнашасаҡ. Фёдор Емельяненко республикала ҡушма алыш төрҙәренең үҫеше, үҙенең Башҡортостанға алтынсы тапҡыр килеүе, бынан алты йыл элек Өфөләге Олимпия резервы мәктәбе спортсыларының уҡтан атыуын күреүе һәм башҡалар тураһында һөйләне. Ул шулай уҡ яҡташыбыҙ, 2000 йылдан ҡушма алыш яуҙарында ҡатнашҡан, хәрби самбо буйынса ике тапҡыр чемпион булған һәм панкратион буйынса чемпион Венер Ғәлиев менән таныш икәнлеге хаҡында әйтте. “Икебеҙ ҙә хәрби самбо буйынса Рәсәйҙең йыйылма командаһында булдыҡ”, - тине бөтә донъяға билдәле спортсы. Фёдор Емельяненко башҡорт көрәше тураһында ла һөйләне. Ул самбоны ойошторғанда башҡорт милли көрәш алымдарының алыныуы хаҡында әйтте. “Көрәштең үҙен интернеттағы видео аша ғына күргәнем бар. Әммә уның һөҙөмтәле һәм ҡыҙыҡлы көрәш төрө икәнлеге хаҡында ишетеп беләм, - тине ул. – Самбоны уйлап сығарғанда Анатолий Харлампиевтың көрәштең төрлө төрҙәрен өйрәнгәнлеге, шул иҫәптән милли көрәштең төп урындарҙың береһен алыуы хаҡында беләм”. Фёдор Емельяненко республикала ҡушма алыш төрҙәренең үҫеше һәм был спорт төрө буйынса федерация эшенең Мәскәү, Силәбе ҡалаларындағы, Дағстандағы кеүек ошондай ойошмалар менән бер рәттә икәнлеге тураһында белдерҙе. Рәсәй турнирында Рәсәйҙең 40-тан ашыу төбәгенән 150-нән күберәк спортсының ҡатнашыуы көтөлә. Әйткәндәй, турнир сиктәрендә “Бергәләп еңәбеҙ” тигән хәйриә акцияһы ла ойошторола: яман шеш менән сирләгән балаларға аҡсалата ярҙам күрһәтеләсәк. Автор фотоһы.