5 майда Республика йортында Башкортстан Башлыгы Радий Хәбиров Русиянең Катнаш көрәшләр берлеге (MMA) президенты, спортчы Федор Емельяненко белән очрашты. Көн тәртибендә — төбәктә көрәш сәнгате үсеше һәм яшьләргә физик тәрбия бирү.Башкортстан Башлыгы кунакка спорт көрәшен популярлаштыручы проектларда актив катнашырга тәкъдим итте.— Сезне республикада күрүебезгә шатмын. Башкортстан — бик спортлы төбәк, бездә яшьләр күп. Балаларыбыз һәм үсмерләребез нык һәм сәламәт булсын өчен, без спорт көрәшен актив үстерәбез, – диде Радий Хәбиров. — Көрәш сәнгатен популярлаштыру бу өлештә зур әһәмияткә ия. Сезнең килүегез бу эшкә яңа этәргеч бирер дип уйлыйм.Төбәк җитәкчесе Федор Емельяненконы 2024 елда Уфада узачак Көрәш сараен ачу тантанасына чакырды.- Бу - 30 мең квадрат метр мәйданлы бик зур объект. Анда күпсанлы көрәш дисциплиналары укытылачак, иң югары дәрәҗәдәге ярышлар уздырылачак, – дип өстәде Радий Хәбиров. - Анда катнаш көрәш буенча турнирлар да үткәрергә мөмкин булачак. Бездә тагын бер заманча спорт мәйданчыгы бар — Рима Баталова исемендәге Спорт әзерлеге үзәге. Анда спорт көрәше буенча Русия чемпионаты уза. Аның мөмкинлекләрен дә өйрәнергә кирәк. Балаларга төп көрәш күнекмәләрен җиткерү мөһим.Федор Емельяненко бу тәкъдимне хуплады. Башкортстанның катнаш көрәшләр федерациясе мондый ярышларны оештыру мөмкинлеген эшләячәк.- Республикада спорт көрәшенең төрле төрләре үсеш алуы сөендерә. Әлбәттә, без ММА буенча турнир уздыру белән кызыксынабыз. Анда төрле көрәш техникасы элементларын күрсәтә алабыз, – дип билгеләп үтте Федор Емельяненко.Билгеле булуынча, төбәктә катнаш көрәш белән барлыгы 3 меңнән артык бала шөгыльләнә. Дәресләрне 26 тренер үткәрә. Моннан тыш, 28 судья аттестация алды. Бу эш турында очрашуда Башкортстанның Катнаш көрәш төрләре буенча федерация президенты Руслан Зарипов сөйләде. Фото: glavarb.ru