5 майҙа Республика йортонда Башҡортостан Башлығы Радий Хәбиров Рәсәйҙең Ҡушма алыш төрҙәре союзы президенты, спортсы Фёдор Емельяненко менән осрашты. Көн ҡаҙағында төбәктә яугирлек сәнғәте үҫеше һәм йәштәрҙе физик йәһәттән тәрбиәләү булды. Башҡортостан Башлығы спорт көрәшен популярлаштырған проекттарҙа әүҙем ҡатнашырға саҡырҙы. - Һеҙҙе республикала сәләмләүемә шатмын. Башҡортостан – спорт яратҡан төбәк, беҙҙә йәштәр күп. Беҙ балалар һәм үҫмерҙәр ныҡ булһын өсөн спорт көрәшен әүҙем үҫтерәбеҙ, - тине Радий Хәбиров. – Яугирлек сәнғәтен популярлаштырыу был йәһәттән ҙур әһәмиәткә эйә. Һеҙҙең килеүегеҙ был эшкә яңы этәргес көс булыр, тип уйлайбыҙ. Республика етәксеһе Фёдор Емельяненконы 2024 йылда үткәреләсәк Көрәш һарайын асыу тантанаһына саҡырҙы. - Был –дөйөм майҙаны 30 мең квадрат метр тирәһе булған бик ҙур объект. Унда күп кенә көрәш дисциплиналарын уҡытасаҡтар, иң юғары кимәлдәге көрәш ярыштарын үткәрәсәктәр, - тине Радий Хәбиров. – Унда ҡушма алыш төрҙәре буйынса ярыштар ҙа үткәрергә мөмкин буласаҡ. Беҙҙең тағы заманса майҙансығыбыҙ бар – Рима Баталова исемендәге спорт әҙерлеге үҙәге. Унда Рәсәйҙең спорт көрәше буйынса чемпионаттары үтә лә инде. Мотлаҡ уның мөмкинлектәрен өйрәнергә кәрәк. Балаларға көрәш нигеҙҙәрен мотлаҡ тапшырырға кәрәк. ММА союзы президенты Фёдор Емельяненко был тәҡдимде хупланы. Башҡортостандың Ҡушма алыш төрҙәре федерацияһы бындай ярыштарҙы ойоштороу мөмкинлеген ҡарай. - Республикала спорт көрәшенең төрлө төрҙәрен үҫтереүҙәре ҡыуаныслы. Әлбиттә, беҙ ММА буйынса турнирҙы үткәреү буйынса ҡыҙыҡһынабыҙ. Унда төрлө көрәш техникаһы элементтарын күрһәтә аласаҡбыҙ, - тип белдерҙе Фёдор Емельяненко. Әйткәндәй, төбәктә ҡушма алыш төрҙәре менән өс меңдән ашыу бала шөғөлләнә. Күнекмәләрҙе 26 тренер үткәрә. Бынан тыш, 28 судья аттестация үткән. Был хаҡта осрашыуҙа республиканың Ҡушма алыш төрҙәре федерацияһы президенты Руслан Зарипов һөйләне. Фото, сығанаҡ: glavarb.ru/rus/press_serv/novosti/165