“Ватанды һаҡлаусыларға ярҙам” темаһына үткәрелгән түңәрәк өҫтәл “Яҡташлыҡ көсө” форумының иң мөһим секцияларының береһе булғандыр, сөнки әле илебеҙҙә граждандар йәмғиәтенең бөтә көстәре махсус хәрби операцияла ҡатнашыусыларға ярҙамға ташланған. Башҡортостанда муниципалитеттарҙың, ауыл биләмәләренең бөтә хакимиәттәре, предприятиелар, эшҡыуарҙар, йәмәғәт ойошмалары һәм, әлбиттә, ирекмәндәр, битараф булмаған кешеләр яугирҙәргә һәм уларҙың ғаиләләренә ярҙам күрһәтә. Секцияны Башҡортостан Дәүләт Йыйылышы – Ҡоролтай депутаты Гөлнур Ҡолһарина алып барҙы. Иң беренсе булып һүҙ республиканың ғаилә, хеҙмәт һәм халыҡты социаль яҡлау министры Ленара Ивановаға бирелде, ул был тәңгәлдә дәүләттең, республика властарның нимә эшләүе тураһында һөйләне. Уның белдереүенсә, уҙған йылдан Башҡортостанда республика Башлығы Радий Хәбировтың указы менән махсус хәрби операцияла ҡатнашыусыларҙың ғаиләләренә булышлыҡ итеү буйынса саралар планы раҫланған һәм был эш системалы рәүештә алып барыла. Быйыл ғына махсус хәрби операцияла ҡатнашыусыларға һәм уларҙың ғаиләләренә ярҙам күрһәтеүгә республика ҡаҙнаһынан 4 миллиард һумдан ашыу аҡса йүнәлтеләсәк. – Яугирҙәргә һәм уларҙың ғаиләләренә социаль түләүҙәр биреү менән бер рәттән бөтә эшмәкәрлек йүнәлештәре буйынса комплекслы ярҙам талап ителде. Тәү сиратта, көнкүреш мәсьәләләре барлыҡҡа килә. Бик күп бурыстарҙы хәл итергә кәрәк. Беҙ махсус хәрби операция биләмәһендә хәрби бурыстарын үтәгән ир-егеттәребеҙҙең ҡайтыуын көтәбеҙ. Уларға медицина, социаль, психологик реабилитация талап ителәсәк, бәлки йәрәхәтләнеү һәм элекке эшмәкәрлек төрөнә ҡайта алмау сәбәпле ҡабаттан уҡытырға кәрәк булыр. Уларға яңы һөнәр үҙләштерергә һәм йәмғиәткә файҙалы булырға ярҙам итергә тейешбеҙ. Көстәр ҡулланыу өсөн майҙандар бик күп, ә беҙҙең бурыс – был эште бюрократик ҡаршылыҡтарһыҙ ойоштороу, – тине Ленара Иванова. Шулай уҡ ул бында, тылда яугирҙәрҙең ғаиләләренә күрһәтелгән ярҙам төрҙәренә айырым туҡталды. Дәүләт Думаһы депутаты, республиканың Ситуация үҙәге координаторы Римма Үтәшева үҙенең сығышы ваҡытында Башҡортостанда берҙәм медицина үҙәге кәрәк тигән фекер әйтте. Уныңса, тәү сиратта хәрбиҙәрҙең туғандарын һәм яҡындарын контролгә алырға кәрәк, сөнки ирҙәр үҙҙәре тураһында түгел, ә тәү сиратта өйҙәге ата-әсәһе, ҡатындары һәм балалары тураһында уйлай һәм уларҙы ҡайғырта. Әммә был хәрбиҙәр тураһында оноторға ярай тигәнде аңлатмай. – Яугир ялға ҡайтты икән, табип уның мөрәжәғәт иткәнен дә көтөп тормай барып, хәлен белергә тейеш. Бынан тыш, йәрәхәтләнгән Башҡортостан кешеләре Оборона министрлығының госпиталдәрендә ята. Ә уларҙың Өфөлә дауаланғыһы килә. Беҙҙә дауаның беренсе этабынан һуң хәрбиҙәрҙе алып ҡайтып, уларға реабилитация үткәрә алырлыҡ медицина учреждениелары бар. Мөрәжәғәттәр ҙа бар, тик быны республика үҙе генә хәл итә алмай. Өсөнсөһө – ауыр йәрәхәтләнеп, сәләмәтлеген юғалтып ҡайтҡандар. Уларға махсус ярҙам кәрәк. Күптәре йәштәр, уларҙы эшкә урынлаштырырға, психологик һәм социаль ярҙам күрһәтеү мөһим, – тине ул. Артабан түңәрәк өҫтәлдә үҙ фекерҙәре менән ирекмәндәр уртаҡлашты. Улар махсус хәрби операия башланыу менән хәрбиҙәргә һәм уларҙың ғаиләләренә ярҙам итә башланы һәм был эш хис тә туҡтатағын юҡ. Кемдең ҡулынан нимә килә, шуны эшләйҙәр: кәрәкле әйберҙәр тегәләр, ойоҡ бәйләйҙәр, маскировка селтәрҙәре үрәләр, боҙолмай торған аҙыҡ-түлек хәстәрләйҙәр. Эшҡыуарҙар, предприятиелар һәм ябай кешеләр берләшеп махсус машиналар, мобиль мунсалар һәм бронялы техникаға тиклем ебәрә. “Беҙҙең патриот” штабы координаторы, Башҡорт ҡатын-ҡыҙҙары йәмғиәте ҡарамағындағы Махсус хәрби операцияла хеҙмәт итеүселәрҙең әсәләре һәм ҡатындары комитеты етәксеһе урынбаҫары Ғәлиә Бикбаева әхирәттәре, ауылдаштары менән кәрәк-яраҡ тегеү эше менән шөғөлләнә. Уның үҙенең дә улы хәрби. Улар алғы һыҙыҡҡа 500 пар ойоҡ, 600 балаклава, 150 комплект йылы флис кейем ебәргән. Әле иһә хобтар, тактик носилкалар әҙерләйҙәр, маскировка селтәрҙәре үрә. Һәм был эш артабан да дауам итәсәк ти Ғәлиә Бикбаева. Улы махсус хәрби операцияла һәләк булған һалдат, Әбйәлил районы егете Таминдар Ғәлиуллиндың әсәһе Дилә Ғәлиуллина һәләк булған егеттәрҙең хәтерен мәңгеләштереү һәм уларҙың ғаилә ағзаларын йәмәғәт эшмәкәрлегенә йәлеп итеү тураһында һөйләне. “Берҙәм Рәсәй”ҙең “Йәш гвардияһы” төбәк штабы етәксеһе Оскар Лютов гуманитар ярҙам күрһәтеүҙә йәштәрҙең өлөшө тураһында һөйләне. Түңәрәк өҫтәлдә ирекмәндәр, хәрбиҙәр, ветерандар ойошмалары етәкселәре һәм башҡалар сығыш яһаны һәм был эште Еңеүгә тиклем дауам итергә һүҙ ҡуйышты. Айрат Нурмөхәмәтов фотолары.